Lajme

Etmond Guri, kryetar i Federatës së Shoqatave Shqiptare në Greqi, i ka dhënë një intervistë “Deutsche Welle”. Guri flet për situatën e fundit në vendin fqinj, për ligjin për emigracionin dhe papunësinë e madhe që ka krijuar për emigrantët shqiptarë, sidomos paraliza në sektorin e ndërtimit. Është folur shumë për një kthim të mundshëm të emigrantëve, është dhënë me këtë rast edhe një shifër: 180 mijë. Nga këta një pjesë është rikthyer në Greqi. Arsyeja? “Kthehen të dëshpëruar nga mëmëdheu. E ndjejnë vetëm përsëri jetim në vendin e tyre.

Partia Demokratike ka rikthyer sot temën e kriminalizimit, duke akuzuar përmes gazetës zyrtare, “Rilindja Demokratike”, të zgjedhurin për kryetar bashkie në Krujë, Artur Bushi, si person me precedentë penalë. “Provave të mëparshme të tij se ishte i arrestuar nga policia italiane për trafikun e kokainës nga Holanda në Itali i shtohet edhe një provë tjetër e Prokurorisë së Napolit. Kryebashkiaku i sotëm i Bashkisë së Krujës rezulton të jetë dënuar në Napoli për trafikun e prostitucionit.

Kreu i LZHK­-së dhe deputeti i Kuvendit, Dashamir Shehi, kërkon nga kryetari i opozitës, Lulzim Basha, të nisë nga shtatori krijimin e një teze të besueshme për shqiptarët dhe opozitën, dhe të mos identifikohet më me ish-­kryeministrin, Sali Berisha. Në një intervistë për “Panorama”, Shehi bën analizën e tij lidhur me shkaqet e humbjes, duke evidentuar edhe efektet pozitive që erdhën prej saj.

Javën e  ardhshme në Tiranë do të mbërrijnë, zyrtarë të lartë amerikanë dhe të Bashkimit Europian. Zv/ sekretarja amerikane e shtetit Victoria Nuland do të jetë në kryeqytet të hënën, ndërsa të martën do të jetë radha e Presidentit të Parlamentit Europian, Martin Schulz, i cili përveç takimeve me krerët e politikës pritet të mbajë një fjalim në Parlamentin Shqiptar. Të mërkurën zhvillon një vizitë zyrtare Ministri i Jashtëm Grek, Nikos Kotzias.

Rreth 60 biznese fasoni që punojnë në Jug të vendit po vuajnë pasojat e para të krizës greke, pasi kanë bllokuar eksportin. “Monitor” thotë se përtej përpjekjeve deri në pamundësi për të zbehur efektin e vërtetë që kriza greke pritet të japë në ekonominë shqiptare, në rajonet e Gjirokastrës, Korçës, dhe në përgjithësi në të gjithë Shqipërinë e Jugut, bizneset janë vënë para bllokadës reale për ekzistencë. Pasojat e para kanë rënë mbi kompanitë shqiptare të eksportit që kanë destinacion Greqinë.

A ka në botë seli qeverie që duket kështu?

Disco Kryeministria by 3-14-15-92

Plani grek i reformave është pritur me rezerva nga kreditorët dhe Eurogrupi që edhe pse kanë quajtur një bazë të mirë për arritjen e një marrëveshje, janë shfaqur skeptikë nëse qeveria e Aleksic Cipras do të jetë në gjendje të zbatojë këtë plan. Siç raportojnë mediat greke, grupi negociator është përballur edhe me një kërkesë politike të partnerëve që kërkojnë një qeveri të shpëtimit kombëtar që do ta bëjë zbatimin e planit më të besueshëm.

Kontrolli i Lartë i Shtetit kallëzon në Prokurori Zv/kryetarin e Bashkisë së Fierit, 2 drejtorë dhe 1 specialist, për shpërdorim detyre dhe shkelje në fushën e prokurimeve publike. KLSH ka konstatuar një sërë shkeljesh nga auditi nr. 1201/1, datë 05.01.2015, për periudhën nga Janar 2013 deri më Dhjetor 2014, në bashkinë e Fierit.

Më 3 korrik Komisioneri kundër diskriminimit urdhëroi Operatorin e Shpërndarjes së Energjisë Elektrike të japë kushte lehtësuese për të përfituar nga skema e faljes së kamatëvonesave për familjet në skemën e ndihmës ekonomike, vendim që sipas Komisionerit pritet të përfitojnë  dhjetëra mijëra familje shqiptare. Sipas njoftimit Komisioneri u vu në lëvizje nga kërkesa e një qytetari nga Elbasani, i cili u ankua për faktin se nuk kishte qenë në gjendje të përfitonte uljen e kamatëvonesave në masën 80 për qind pasi nuk e dispononte të gjithë shumën e kërkuar si kusht për këtë përfitim.

Edhe pse njëri kryetar aktual i PD-së dhe tjetri ish-kryetar, ky i fundi e ka lënë të presin ë radhë pasardhësin. Gazeta “Standart” shkruan se kreu i Partisë Demokratike, Lulzim Basha, ka filluar një tur të rëndësishëm takimesh me faktorët kryesorë, ndërkombëtarë për delegjitimimin e zgjedhjeve, ndërsa po takon në mënyrë intensive edhe aktorët e politikës së brendshme. Gjatë ditëve të fundit, përveç vizitës në Vjenë, Basha ka takuar edhe ambasadorin amerikan Lu në një drekë informale dhe rastësore siç raportojnë media të ndryshme.