Në Kapshticë hapet Fronti i Dytë, bllokohet Tv Klan drejt takimit epokal të Selanikut

Pas frontit të Ukrainës dhe problemeve me shumë të panjohura në relacionet Serbi-Kosovë, Europës i hapet një front i tretë në Kapshticë. Sipas raportimeve të disa gazetarëve të Tv Klan, përcjellë në stilin e dikurshëm dramatizues – Govorit Mockva – po njoftohemi për një shkelje të jashtëzakonshme të drejtash nga një shtet të cilin Blendi Fevizu, reportazhieri i mirënjohur i vetes, e cilëson se drejtohet dhe sundohet nga mllefi dhe inati.

Ekipit i janë bllokuar pasportat për dy orë dhe i kërkohet notë nga Ministria e Jashtme për të kaluar. Episodi është padyshim një përshkallëzim i rrezikshëm i situatës së sigurisë në Mesdhe që mund të marrë drejtime të panjohura.

Është shumë e paqartë se në cilën klimë kryeministri Rama do të udhëtojë tashmë drejt Selanikut për takimin me emigrantët, pasi në kushtet kur aktivitetin nuk e mbulon Tv Klan, a ka më shanse që e vërteta madhështore e atij takimi të evidentohet siç duhet?

Si redaksi i bëjmë thirrje autoriteteve greke të lejojnë ekipin e televizionit të kalojë sepse e vërteta do të dalë. Selanik e përpjetë, siç ka qenë do të jetë-, thotë një fjalë.