bota

Në Francë është rikthyer frika e sulmeve terroriste. Ministri i Brendshëm, Gerald Darmanin, thotë se kërcënimi terrorist në Francë është "shumë i lartë" dhe për këtë do të shtohet prania e trupave policore në vendet fetare. Në një intervistë në France-Inter Radio, Darmanin tha se operacionet e sigurisë do të rriten në vendet ku grumbullohen besimtarë, ndërsa shtoi se duhet trajtuar "islamizmin e shfrenuar që po armatos njerëzit në mënyrë ideologjike".

Gjermania është vendi i radhës që shtrëngon masat kundër koronavirusit. Plani i ri parashikon mbajtjen e shkollave të hapura, por do të mbyllen baret, palestrat, kazinotë etj.

Sipas Reuters, që i referohet Bild, Merkel ka thirrur krerët e provincave gjermane për të diskutuar mbylljen nga data 4 nëntor.

Dyqanet mbeten të hapura, nëse mbajnë higjienën dhe të kufizojnë numrin e njerëzve të pranishëm njëkohësisht në ambiente të mbyllura.

Sa për restorantet, klientët do të munden vetëm ta blejnë ushqimin e gatshëm atje dhe ta konsumojnë më pas në shtëpi.

Kur presidenti i ardhshëm i SHBA të betohet në 20 janar 2021, ai do të jetë personi më i vjetër që ka bërë betimin në atë zyrë. Donald Trump, nëse rizgjidhet, do të jetë 74 vjeç; nëse zgjidhet Joe Biden, ai do të jetë 78 vjeç. (Rekordi i mëparshëm është vendosur në 1985, kur Ronald Reagan e mori mandatin e tij të dytë tre javë para se të mbushte 74 vjeç).

Depozitat e metanit në Oqeanin Arktik kanë nisur të rrjedhin. Shkencëtarët kanë gjetur prova se depozitat e metanit të ngrirë - që njohet si "gjiganti i fjetur i ciklit të karbonit " - kanë filluar të emetohen në një zonë të madhe të shpatit kontinental në brigjet e Siberisë Lindore.

Bojkoti i produkteve turke, pavarësisht se nuk është shpallur në mënyrë zyrtare nga disa vende arabe, fitoi peshë pasi u mbështet publikisht edhe nga presidenti turk, Erdogan.

Ai i inkurajoi turqit që "të injorojnë mallrat franceze, duke mos i blerë" gjatë një fjalimi në televizion.

Kjo ishte kthesa e radhës në spiralen e përplasjes së tij verbale me homologun francez, Macron, pas vërejtjeve të këtij të fundit mbi islamin.

Qindra qytetarë italianë kanë protestuar në qytetet kryesore kundër masave të reja të qeverisë për Covid-19. Ajo që nisi si demonstrim është kthyer në një protestë në disa raste të dhunshme, që ka përfunduar me thyerjen e xhamave të dritareve dhe hedhjen e tymueseve dhe fishekzjarreve. Protesta të tilla ka pasur në Torino, Milano dhe qytete të tjera.

Në sheshin kryesor të Torinos, rreth 300 taksi u rreshtuan në mënyrë paqësore për të tërhequr vëmendjen për humbjet ekonomike që u shkakton rënia e turizmit dhe zhvendosja e punës nga zyrat në shtëpi.

Të jesh pozitiv për Sars-Cov-2 nuk do të thotë domosdoshmërisht se mund t’i infektosh të tjerët. Kjo hipotezë ka qarkulluar prej muajsh në komunitetin shkencore dhe më në fund ka një konfirmim. Instituti Mario Negri në Bergamo, një nga zonat më të goditura nga vala e parë e Covid-it në Itali, ka analizuar potencialin infektues të disa të prekurve nga koronavirusi.

Nga 423 vullnetarë që iu nënshtruan testit sierologjik, 23 kanë rezultuar pozitivë edhe pas tamponit. Këta të fundit I janë nënshtruar një krahasimi qelizor.

Ministria ruse e Mbrojtjes ka kritikuar homologen gjermane për pjesëmarrjen në stërvitjet e NATO-s, ku ushtria zhvillon aftësi në përdorimin e armëve bërthamore taktike të SHBA. Pala ruse e konsideron këtë shkelje të Traktatit të Mospërhapjes^*, ose NPT, dhe përfshin rritjen e mëtejshme të tensionit mes Rusisë dhe Linjës së kontaktit të NATO-s.

Një incident i sikletshëm para kompjuterit i ka kushtuar jo pak gazetarit Jeffrey Toobin. I gjendur vetëm në zyrë, duke mos qenë në dijeni se platforma Zoom ishte aktive, Toobin ka vendosur të relaksohet. Nga ana tjetër kanë qenë të shumtë “spektatorët”, kolegë të tij, që kanë parë shkrimtarin e New Yorker dhe analist ligjor i CNN teksa masturbohej.

"Mendova se nuk më shihte njeri. Mendova se e kisha mbyllur videon". Ndërkohë, New Yorker, për të cilin ai ka punuar për 25 vjet, e ka pezulluar nga detyra. Të njëjtën gjë ka bërë edhe CNN.

Akuzat për mbulimin e skandalit të abuzimit seksual e kanë detyruar kreun e një dioqeze në Poloni të paraqesë dorëheqjen te Ati i Shenjtë. Papa Françesku pranoi të shtunën dorëheqjen e 68-vjeçarit Edward Janiak nga udhëheqja e dioqezës polake të Kaliszit. Vendimi lidhet me akuzat ndaj tij se ka mbuluar në të kaluarën disa raste të abuzimit seksual të të miturve nga një klerik në dioqezën e tij.