Politikë

Sot në disa media ka qarkulluar një mendim se procedura e zgjedhjes së presidentit mund të shërbejë për të provokuar zgjedhje të parakohshme, e për rrjedhim për të nxjerrë de facto pa vlerë Çadrën e protestës së PD-së. Ideja bazohet thjesht mbi procedurat e parashikuara nga Kushtetuta: tre raundet e para kërkojnë shumicë të cilësuar për zgjedhjen e një kandidati. Dy raundet e fundit kërkojnë shumicë të thjeshtë. Nëse opozita sërish nuk pranon atëherë kalohet në zgjedhje të parakohshme dhe KQZ-ja bën rivendosjen e afateve për regjistrim koalicionesh dhe subjektesh.

Kërkesa e  PS-së dhe LSI-së për shtyrjen e afateve për regjistrimin e koalicioneve, ka provokuar reagime nga disa anëtarë të KQZ-së. Në interpretimin e vetëm të ligjit, anëtarët, disa prej tyre, kanë përcjellë mendimin se kjo nuk mund të bëhet. Kryeministri Edi Rama e cilësoi këtë hap, krejtësisht tinzar dhe që heq edhe atë pak era shtet që kishte filluar të na zinte të gjithëve, si një shprehje të vullnetit të mirë ndaj PD-së. E cila nga ana e vet nuk ka vonuar por ka përpiluar edhe ajo një letër drejtuar KQZ-së.

Ata që shpresonin se Erjon Veliaj nuk do të dilte sot në media, u zhgënjyen. Kryetari i Bashkisë së Tiranës, ka prezantuar atë që e quajti vetë: Portali i Transparencës. Emri tregëtar: “Open Data”.

“Besoj se asnjë shoqëri nuk është rrëzuar nga tepria e informacionit. Sot jemi në një situatë që nuk besoj se do i vijë dëm bashkisë. Vetëm njerëzit kur kanë informacion të bollshëm mund të marrin vendime si për qytetin ashtu edhe për familjen, unë jam njeri me ambicie ndaj e dua Tiranën të parën për transparencën “, tha Veliaj.

Telenovela rozë me darka peshku dhe gjeagjëza politike mbi të ardhmen e partneritetit politik Rama-Meta përtej kureshtjes po afekton edhe procedurat që mbajnë në këmbë të ashtuquajturin shtet shqiptar, duke ekspozuar edhe me letra mungesën e seriozitetit të atyre që qeverisin këtë vend. Sekretarët e dy partive të koalicionit për Shqipërinë Europiane i janë drejtuar me një letër Komisionit Qëndror të Zgjedhjeve, ku i kërkojnë që në kundërshtim me Kodin Zgjedhor të shtyjë me dy muaj afatin e regjistrimit në KQZ të partive politike dhe koalicioneve për zgjedhjet e 18 Qershorit.

“Lufta për pushtet fiton mbi demokracinë – Shqipëria shpërdoron shanset e saj”

Ky është titulli i një shkrimi të shkurtër, publikuar dje në “European Western Balkans”, një faqe e afërt me Brukselin dhe që ka për autore, Sarah Wohlfeld, zyrtare në Këshillin Gjerman për Marrëdhëniet me Jashtë në Qendrën “Alfred von Oppenheim” për Studime Politike Europiane.

Gjykata Kushtetuese ka hedhur poshtë një kërkesë ankimim të Komitetit Shqiptar të Helsinkit që lidhet me nene të caktuara të ligit për dekriminalizimin, zyrtarisht ligji nr. 138/2015 “Për garantimin e integritetit të personave që zgjidhen, emërohen ose ushtrojnë funksione publike”, të ndryshuar”.

http://www.gjk.gov.al/web/NJOFTIM_P_R_MEDIAN_1430_1-1.php

E mbani mend Ilir Metën pas zgjedhjeve të vitit 2015 kur deklaroi se “kur unë them po është po”? Ishte një mesazh për Sali Berishën që donte të thoshte se unë e mbaj fjalën, pra bashkë mund të bashkëpunojmë. Këtë shprehje vetë - lavdërimi të burrërisë së imagjinuar, kreu i LSI-së e përforcoi kur në një emission televiziv deklaroi se “Lulzim Basha të gënjen edhe për orën”.

Të dyja “incidentet me inat” të Metës janë në themel përpjekje për të ngjizur fabulën se dy burra ka politika: Ilir Meta dhe Sali Berisha.

Me kërkesë të Prokurorisë për Krime të Rënda, Gjykata për Krime të Rënda ka vendosur sekuestro preventive ndaj aksioneve bankare me vlerë rreth 113 milionë lekë të reja, të bashkëshortes së deputetit Alfred Peza,  shtetases Mirela Ndini. Procedimi penal për këto vepra penale ka nisur kryesisht nga Prokuroria e Përgjithshme dhe ka si objekt hetimin e pasurive të deputetit të Kuvendit të Shqipërisë, Alfred Peza.

Kryeministri ka bërë dje ofertën e fundit për Ilir Metën, teksa gjatë një interviste për emisionin “Dritare” ka lënë të kuptohet se pritmëria e shqiptarëve që me reformën në drejtësi Ilir Meta dhe Sali Berisha duhen futur në burg, është e drejtë.

Ministria e Brendshme e Shqipëria paralajmëron qytetarët për situatën e brishtë të sigurisë ku ndodhet vendi. Përmes një njoftimi për shtyp, Ministria bën me dijë se në ditën e Pashkëve u angazhuan në gatishmëri 5000 policsë, nisur edhe nga njoftime të caktuara për akte destabilizuese. Me më shumë rëndësi është fakti se dikasteri që drejtohet nga Fatmir Xhafaj nënvizon potencialin destabilizues të situatës politike që mund të shfrytëzohet përmes akteve tgë ndryshme nga aktorë të caktuar.