Arkiv-Lajme të përditësuara

Korea e Veriut synon të realizojë reforma që do të lejojnë fermerët të mbajnë më shumë prodhim për veten e tyre në vend që ta dorëzojnë atë pothuajse te gjithe tek shteti, ashtu siç kërkohet aktualisht. 

Reforma me nuanca kapitaliste shihet si një tentativë për të inkurajuar prodhimshmërinë në shtetin komunist, ku përqendrimi i buxhetit për projekte ushtarake dhe në industrinë e rëndë ka sjellë mungesa kronike në ushqim.

”BBC” citoi në këtë lajm një editorial në shtypin koreanoverior, por reforma nuk është shpallur ende zyrtarisht.

Zyrtarë të Bashkimit Europian paralajmëruan se do të jetë më e vështirë se kurrë që të arrihet një marrëveshje për buxhetin disa-vjeçar, i cili pritet të votohet së shpejti. 

Ministrat e Financave të vendeve të BE-së u takuan ditën e hënë për bisedime të mëtejshme, ndërsa liderat e vendeve të unionit do të takohen në nëntor në një samit të jashtëzakonshëm, në përpjekje për të arritur një marrëveshje.

Komisioni Europian ka propozuar një buxhet të përgjithshëm prej 1,033 miliardë eurosh për periudhën 2014-2020.

Deficiti tregtar ka pësuar një rritje prej 0.4 përqind në muajin gusht krahasuar me muajin korrik. Sipas të dhënave mujore të INSTAT, këtë muaj deficiti ishte 28.3 miliardë lekë, duke shënua një ulje me 13.8 përqind krahasuar me muajin gusht të një viti më parë.

Edhe eksportet kanë shënuar një rënie krahasuarme korrikun, në shifrën e 12.7 përqind, ku u eksportuan 17 miliardë lekë mallra. Importi ishte 45.3 miliardë lekë, me një ulje pesë përqind krahasuar me korrikun e këtij viti.

Sindikatat e sektorit publik dhe privat, kanë paralajmëruar grevë mbarëkombëtare për ditën e mërkurë, ndërsa sot mediat në Greqi janë në grevë 24-orëshe. 

Gazetarët, që punojnë në gazeta, radio dhe televizionet private, radio komunale, faqet e lajmeve, dhe mjeteve të tjera kanë ndërprerë transmetimet e lajmeve dhe përditësimin e faqeve të internetit deri nesër në orën 6:00. 

Një raport i ri i grupit për mbikëqyrjen e të drejtave të njeriut me seli në SHBA, Freedom House, njofton se qeveritë në mbarë botën kanë intensifikuar shtypjen e lirisë së internetit, ndërkohë që mjetet e tyre për ta bërë këtë po bëhen më të sofistikuara. 

“Liria në internet 2012”, që mbulon vitin 2011 dhe gjysmën e parë të vitit 2012, gjithashtu citon një tërheqje prapa të shoqërisë civile në kundërshtimin e represionit online. 

Pasditen e së dielës në burgun famëkeq të Koridhalosë, në Athinë, ka mbizotëruar kaosi. 

Qindra të burgosur myslimanë protestuan kundër filmit anti-Islam të prodhuar në Shtetet e Bashkuara që fyen profetin Muhamed. Rebelimi ka filluar në dy prej reparteve ku ndodhen të burgosurit islamikë e më pas është shpërndarë në të gjithë burgun.

Të dënuarit kanë filluar tu vënë zjarrin dysheqeve, dyerve, dritareve, rrobave, ndërsa kanë djegur edhe flamuj amerikanë të improvizuar me mjete rrethanore. 

Zviceranët i thonë jo ligjit antiduhan në vende të mbyllura. Sipas rezultateve të një referendumi në Zvicër, ata kanë kundërshtuar ndalimin e plotë të duhanit. Hotelet, restorantet dhe baret aktualisht kanë dhoma ku u lejohet duhanpirësve, por kritikët thonë se kjo dëmton ata që punojnë me duhanpirësit.

Në disa kantonte të Zvicrës, mbi 70 përqind e votuesve kanë refuzuar ndalimin, sipas gazetës së Gjenevës. Ky qytet dhe shtatë kantone të tjera kanë vendosur në fakt ndalimin e pirjes së duhanit në vende të mbyllura, ndërsa pjesa tjetër kanë qenë më pak kufizuese.

Shqipëria nuk ka as mjekë të kualifikuar dhe as numrin e nevojshëm të  aparaturave në spitalet publike për të bërë transplantet e organeve. Pak ditë pas njoftimit për çeljen e Bankës së parë të Organeve, mjekët e Qendrës Spitalore Universitare në Tiranë pohojnë këtë fakt. Madje sipas shefit të Nefrologjisë, Nestor Tereska, kjo është edhe arsyeja, që prej gati një viti në QSUT janë pezulluar edhe transplantet e veshkave. Sipas tij, edhe në dy transplantet e vetme të kryera në spitalin publik, kanë asistuar edhe mjekë italianë.

Ish-republika sovjetike e Bjellorusisë pritet të përfshihet nga kriza politike, ndërsa vendi mban zgjedhjet parlamentare të cilat janë bojkotuar nga ana e dy partive kryesore të opozitës. Kundërshtarët e presidentit Alexander Lukashenko apeluan votuesit e tyre të mos shkojnë në kutitë e votimit, duke e cilësuar një punë me më shumë vlerë, nëse ata shkojnë të mbledhin kërpudha apo të gatuajnë supë.