Arkiv-Lajme të përditësuara

Qeveria franceze ka në plan të ndihmojë emigrantët romë për të gjetur punë, pa pritur që BE të heqë vitin që vjen kufizimet për punësim për këta njerëz që vijnë nga Rumania e Bullgaria. Vendimi i Parisit vjen pas një sërë spastrimesh të kampeve të paligjshme të romëve që kanë krijuar pakënaqësi te mbështetësit e qeverisë socialiste. 

Ministri i Brendshëm, Manuel Valls i cili urdhëroi operacionet në fjalë, tha se kërkonte një politikë të qartë, humane dhe të arsyeshme për këtë çështje. Ai ishte një nga ministrat që u takua me përfaqësues të komunitetit rom në Paris. 

Masat shtrënguese ekonomike në Spanjë nuk kanë kursyer as policët e këtij vendi, të cilët kanë dalë në protestë në Madrid. Rreth 100 oficerë policie kundërshtuan masat e kursimit të qeverisë së Mariano Rahoit, sipas të cilave parashikohet reduktimi i pagës së 13-të, të cilën punonjësit e marrin në fund të vitit. 

“Po protestojmë kundër politikave të qeverisë aktuale’ u shpreh një prej policëve, i cili zakonisht ruan rendin publik në raste demostratash të dhunshme. 

Një mur i ri Berlini që ndan veriun nga jugu i Evropës, në kuptimin e zonës euro, mund të ngrihet sipas ministrit finlandez për Çështjet Evropiane, Alexander Stubb. 

“Evropa ka qenë e ndarë për rreth 50 vjet mes lindjes dhe perëndimit, prandaj është e kotë ta ndash sot mes veriut dhe jugut”, ka deklaruar Stub për gazetën suedeze “Dagens Nyhter”. 

Klasa e mesme në Shtetet e Bashkuara po jeton një “dekadë të humbur”, pasi pjesa e saj nga të ardhurat e shtetit është reduktuar nga të pasurit. 

Kështu thotë një raport i hartuar nga Pew Research Center, sipas të cilit 62 për qind të klasës së mesme amerikane kanë deklaruar se janë detyruar të reduktojnë shpenzimet. 

Pasuria e fushatës së presidentit amerikan, Barack Obama figuron më pak sesa ajo e kundërshtarit të tij, Mitt Romney i cili kishte në fund të korrikut rreth 60 milionë dollarë më tepër për të pretenduar Shtëpinë e Bardhë, bënë të ditur burime zyrtare amerikane. 

"Sipas një raporti Obama kishte në llogarinë e tij në fund të korrikut rreth 124 milionë dollarë për fushatën dhe partinë e tij", theksuan burimet zyrtare amerikane. 

"Por, kundërshtari i tij, Mitt Romney në të njëjtën periudhë kishte 50 për qind të fondeve shtesë, me rreth 186 milionë dollarë", shtuan burimet.

Diplomacia greke nuk do të ketë sukses në qëllimin për të blerë më shumë kohë nga Bashkimi Europian në zbatimin e reformave. Analistët ekonomikë në eurozonë hedhin poshte argumentin e kryeministrit Antonis Samaras se më shumë kohë nuk do të thotë më shumë para. 

Ekonomisti i tregjeve financiare, Gustavo Bagattini shprehet se më shumë kohë do të thotë që esencialisht, Greqia do të ketë nevojë për 20 miliardë euro fonde nga burime jo të vetat.

Rreth 120 subjekte ushqimore janë konstatuar në Tiranë me probleme të ndryshme vetëm në dy javët e para të muajit gusht. Problemet sipas drejtorit të DSHP, Mhill Gecaj kanë qenë nga mospaisja e punonjësve me libreza shëndetësore, e vetë subjekteve me leje higjeno-sanitare dhe papastërtia në ambientet, ku tregtojnë. Gecaj veçon se dhe në disa restorante me emër në kryeqyetet janë gjetur ushqime, të cilat gjatë analizave kanë rezultuar me ngarkesë bakteriale.

 Presidenti aktual Barack Obama vazhdon të kryesojë ndaj rivalit të tij, Mitt Romney edhe pse diferenca mes tyre është zvogëluar. Sipas sondazhit të Wall Street Journal dhe NBC, Obama ka 48 për qind të votave, ndërsa Romney, 44 për qind, megjithatë këto katër pikë avantazh janë gati-gati sa marzhi i gabimit. Sondazhi tregon se Romney vazhdon të mos ketë simpatinë e republikanëve konservatorë, ndërsa problemi i Obamës vazhdon të mbetet ekonomia. 

Albanian Screen 

Një gjykatë në Kubë dënoi dhjetë persona, ish-punonjës të një kompanie shtetërore, me burgime nga 4-12 vjet, për akuzën e korrupsionit. 

Të pandehurit i pranuan të gjithë fajësinë e tyre gjatë procesit.

Ata kishin përfituar në mënyrë të paligjshme gjatë projektit të zgjerimit të një fabrike të përpunimit të nikelit dhe kobaltit.

Midis të ndëshkuarve ishin edhe tre zëvendësministra.

Në një intervistë për gazetën gjermane Bild kryeministri grek Antonis Samaras ka theksuar se Athinës i duhet pak më shumë kohë që ekonomia të rimarrë veten dhe të zbatohen reformat. 

"Nuk kërkojmë më shumë para ... Ne duam pak hapësirë për të marrë frymë, të forcojmë ekonominë dhe të rrisim të ardhurat. Më shumë kohë, nuk do të thotë automatikisht më shumë para", tha në intervistë Samaras.