T'i gjesh telat Donaldit

Në një vizitë të kryeministrit  brianik Keir Starmer në SHBA, mund të shihet një shembull i rrallë sesi politika perëndimore po përpunon maniera të posaçme për të mos cenuar humorin e Presidenti të ri të Amerikës, Donald Trump. I perceptuar gjerësisht si një njeri që preferon të lavdërohet, të flasë për gjëra që bëhen për herë të parë, ta paprecedenta, të reja, historike, Donald Trump ka imponuar kështu një protokoll të personalizuar që i ka kthyer kryeministrat në diplomatë dhe gati në sekretar oborri. 

Në videon e qarkulluar të bisedës mes Starmer dhe Trump para gazetarëve, ky i fundit thotë disa fjalë për përgjithshme si “Britani një vend i mrekullueshëm”, ndërkohë që Starmer ishte kujdesur për ta surprizuar mikun e ri në Amerikë. Teksa ka shprehur vlerësimin për Trump, Starmer ka kalibaruar gjuhën: sipas tij me Trump nisi koha e paqes në Ukrainë për të shtuar se “ne shpresojmë se kjo do të jetë një paqe që zgjat, historike”.

Termi 'historik' është aty me një dozë cinizmi: sepse paqja që po imponohet si Pazar i hapur vështirë se do të zgjasë sepse nuk është e besueshme. Starmer nuk është ndalur aty. Ai ka bërë dhuratën e vërtetë të miklimit: para gazetarëve ka nxjerrë një zarf ku siç u shpreh ai ishte një letër e Mbretit për Trump.

Ky i fundit e lexoi heshturazi, u frymëzua nga fjalët e mira dhe mandej i kaloi kryeministrit britanik ta lexonte. Për çfarë bëhej fjalë? Starmer u dëshmua gati ditirambik kur u shpreh se ishte një Ftesë. Që nuk ka ndodhur asnjëherë më parë, me porosi të posaçme të Mbretit Trump ftohej për të afirmuar miqësinë dhe aleancën.

E pabesueshme! Një kryeministër i Britanisë merr rolin e një postieri mbretëror për të inkuadruar në presidentin e paparashikueshëm amerikan nga mania e tij për të deklaruar gjëra që bëjnë bujë pa dalë nga goja dhe sfumojnë apo ndërlikojnë mandej çdo marrëdhënie. Sesa e vërtetë është kjo e ilustron mënyra sesi Trump iu përgjigj pyetjes nëse mendonte ende se Zelenskiy ishte diktator:

Pse e kam thënë unë këtë? Nuk mendoj se e kam thënë

Vetëm sot Zelenskiy, një diktaror dy javor ishte në Shtëpinë e Bardhë për të firmosur marrëveshjen për mineralet e rralla. Pastër dhe qartë: kjo ndodh kur një pushtet shumë i madh bie në dorë të dikujt që ka zhvilluar nocione personale për shtetet dhe marrëdhëniet mes tyre. Në thelb sistemi ndërkombëtar po i afrohet përherë e më shumë një sistemi me disa monarki ku ligjëron Perandori i Shenjtë i Romës që kurorën e ka vënë si fillim në mediat sociale.

Të urojmë se në vizitën që do të zhvillojë në Britani të mos shkojë me kurorë, çka do të ishte një gjest napoleonik dhe shumë i pangjashëm me formatin e biznesmenit Trump.

s.zaimi