kosova

Një herë është Macron, njëherë Europa, një herë marrëdhëniet e vështira kufitare. Pak ditë pasi Ballkani Perëndimor mori lajmin se zgjerimi i BE-së frenohet sepse Parisi zyrtar mendon reformimin, nga pala amerikane vjen një tjetër ultimatum. 

Zyrtari amerikan për Ballkanin, Mathew Palmer është shprehur në Prishtinë se Serbia nuk ka për t’u anëtarësuar në BE pa njohur më parë Kosovën. 

Marrëdhëniet mes Shqipërisë dhe Kosovës me ardhjen e qeverisë së re në Prishtinë, duket se do të ndërlikohen edhe më tej. Gazeta “Koha Ditore” shkruan sot se ideja e minishengenit ballkanik po lexohet si e dëmshme në Kosovë nga aktorë të ndryshëm mediatikë dhe politikë. Ndër personat që prononcohen është edhe Albulena Haxhiu e Lëvizjes Vetëvendosje, sipas së cilës qëndrimi I Shqipërisë e ka dëmtuar Kosovën. 

Një operacion policor në Veri të Kosovës nga forcat speciale kosovare ka dhënë shkas që nga Serbia të rizgjohen reagimet e njohura për ndëryrje në territorin e shteti fqinj.

Kësaj radhe mediat serbe citojnë një zyrtar të dorës së dytë dhe që pak lidhje ka me vendimmarrjen reale për kësi gjërash. Drejtori i Polisisë serbe, Vladimir Rebiç ka deklaruar se Beogradi është i përgatitur të ndërhyjë nëse ndodh një eksod i serbëve por mandej ka shtuar se është i bindur se komuniteti ndërkombëtar nuk do ta lejojë një gjë të tillë.

Presidenti serb Aleksander Vuçiç ka shfaqur nervozizëm pas takimit të tij me përfaqësuesin e posaçëm amerikan për dialogun Kosovë-Serbi, Richard Grenell. I pyetur nga gazetarët, Vuçiç ka deklaruar se kur vjen puna për Kosovën atij nuk i është ofruar asgjë në këto shtatë vjet dhe se pas takimit të fundit I duhet kohë të mendojë se çfarë duhet të bëjë. 

Askush nuk po na ofron asgjë, askush nuk po na ofron ndarjen. Nuk do të na japin asgjë…Kam nevojë të mendoj rreth atyre që më tha Grenell dhe të vendos për hapat e radhës

Shtetet e Bashkuara të Amerikës vijojnë t’i përmbahen idesë se marrëveshja mes Serbisë dhe Kosovës kalon nga shkëmbimi i territoreve. E lidhur kryesisht me ish-këshilltarin e Sigurisë, John Bolton, ideja në fjalë u kundërshtua nga Gjermania, ndonëse u pranua nga presidenti i Kosovës, Hashim Thaçi dhe u mbështet nga qeveria e Edi Ramës.

Një lëvizje pas zgjedhore e Partisë Demokratike të Kosovës për rinumërim votash duket se njofton skenarë të mundshëm për të nxjerrë jashtë loje në formimin e qeverisë Lëvizjen Vetëvendosje. Së pari vetë kërkesa, ndonëse legjitime, hap spiralen e kontestimit dhe korrigjimit eventual të përqindjeve, ndërkohë që menjëherë sapo rezultati u u bë i qartë, nga Beogradi nisën intrigat dhe presionet.

Përfaqësuesi i ri i bashkimit Europian për Politikën e Jashtme, Joseph Borrell ka deklaruar në Komitetin e Parlamentit Europian për Çështjet e Jashtme se marrëveshja mes Kosovës dhe Serbisë duhet arritur sa më shpejt. Për këtë arsye ai ka premtuar se do të angazhohet personalisht dhe se vizitën e parë jashtë do ta zhvillojë në Prishtinë, pasi siç tha “Serbinë tashmë e njoh mirë”.  

Donald Trump i ka lënë sërish të gjithë me gisht në gojë. Pak javë më parë në Tiranë apo gjetkë në Ballkan u “festua” caktimi i Mathew Palmer si zyrtari kryesor në Departamentin e Shtetit për Ballkanin, por sot ka njerëz që pyesin se çfarë do të bëjë Palmer ndërkohë që Shtëpia e Bardhë ka emëruar ambasadorin amerikan në Gjermani, Richard Grenell si të dërguar të posaçëm për Kosovën dhe Serbinë.

Marrëveshja me Kosovën është kusht që Serbia të anëtarësohet në Bashkimin Europian. Ambasadori i Gjermanisë në Beograd, Thomas Schieb, ka përsëritur nevojën e një konkluzioni pozitiv të dialogut të nisur gjatë një interviste për Prva Tv. Ai ka sqaruar se procesi i nisur do të vazhdojë nën të njëjtin format që ka ecur deri më tani, por përfaqësues do të jetë Josep Borrell.

Presidenti i Serbisë, Aleksander Vuçiç ka dalë së fundmi me një interpretim tjetër për sa i përket dialogut me Kosovën dhe ideve për demarkacionin. Ai nuk ka përdorur termin ndarje dhe shkëmbim territori, por demarkacion, kundër të cilit sipas tij është Gjermania. Sipas Vuçiç që ka folur në një intervistë për Zërin e Amerikës, ShBA nuk ka ndonjë interes të posaçëm për llojin e marrëveshjes që do të arrihet, përveçse do një marrëveshje përfundimtare.