Arkiv-Lajme

Mbledhja e para pak orëve e qeverisë, kishte në objekt të saj shëndetësinë (të paktën këtë kuptuam nga monologu i përjavshëm i Kryeministrit), ku kreu i qeverisë foli për zhvillimet në këtë sektor dhe uljen e vdekshmërisë foshnjore duke na krahasuar edhe me vendet e zhvilluara.  “Tregues për vdekshmërinë foshnjore, amtare është ulur. Për herë të parë vendi ynë arrin këta tregues themelorë të jetës, duke u renditur në grupin e vendeve të zhvilluara me mortalitet infantil 1 shifror”, - tha ai.

Mandati presidencial i Boris Tadiçit do duhej të përfundonte në dhjetor të këtij viti, por vetë ushtruesi i tij ka vendosur t’i japë fund më shpejt. Ai ka dhënë dorëheqjen. Por jo ngaqë kjo përgjegjësi i ka ardhur në majë të hundës, por sepse ka në mendje të kërkojë një mandat tjetër. E ka marrë këtë vendim, sepse është me idenë – ky është një motivimet – që data 6 maj e zgjedhjeve të përgjithshme të shfrytëzohet edhe për zgjedhjet presidenciale; kështu do të kursehen pará, nerva, energji, etj.

Ambasadori i Mbretërisë së Danimarkës, Karsten Ankjaer Jensen, ka folur për Shqipin, dhe ajo që bie në sy është ‘kërcënimi’ që ai bën maxhorancës, nëse kjo e fundit këmbëngul të zgjedhë president një të vetin. “Institucionet e pavarura, si Presidenca, janë gurët e themelit të një shoqërie demokratike; pa to demokracia nuk ekziston, prandaj zgjedhja e Presidentit do të ketë ndikim të thellë, edhe në aftësinë e Shqipërisë për të përparuar drejt BE-së; përsëri për mirë ose për keq”, thotë ai në mënyrën më të qartë të mundshme.

Gjergji Bojaxhi ka provuar një zhgënjim të madh prej PD-së. Po ku konsiston ky zhgënjim? Nga se ka ardhur? Pse në këtë moment? Pse jo më parë? Ai lë të kuptohet se gjatë 13 viteve në SHBA e kish krijuar një ide se ç’kish qenë PD-ja e Berishës, por nostalgjia për PD-në e fillimit të mbushur me intelektualë dhe ideja se “asgjë s’mund ta njohësh më mirë pa qenë brenda” e kanë bërë t’i futet ‘aventurës’. Përveç kësaj, si një element të dytë që ka sjellë zhgënjim është fakti që në PD e në maxhorancë “pushteti ngatërrohet me karriken dhe politika ngatërrohet me pushtetin”.

Gazetari Renato Kalemi i revistës Klan i ka marrë një intervistë Kreshnik Spahiut. Ja disa pasazhe nga intervista “e shtrydhur”:

-Sondazhet tona, por dhe të kundërshtarëve, na nxjerrin forcë të parë në disa qarqe të rëndësishme në vend. Siç mund ta keni vënë re, dy sulltanët kur zihen me njëri-tjetrin citojnë sondazhe të papublikuara që i referohen përqindjes sonë të lartë. Vetëm që nuk tregojnë përqindjet e tyre, që janë nën 33 për qind.

-Ne do të bëjmë një program centrist.

E përditshmja Zëri, duke u bazuar tek një informacion i dhënë nga “burimet ndërkombëtare të akredituara në Kosovë”, e ka dhënë qysh më 16 mars lajmin se Thaçi do takohet me Obama-n. Dhe me atë rast nënvizonte se “ishte Washingtoni që i dha mbështetje kryeministrit Thaçi për prezantimin e Kosovës me fusnotë”.

Tema online ka dhënë lajmin se “ambasadori i OSBE-së në Tiranë, Eugen Wollfarth, ka bërë një deklaratë të papritur, duke thënë se presidenti i përket mazhorancës; sipas Wolfarth-it, vijon Tema, tashmë PD-ja duhet të zgjedhë kandidatin e duhur për president.”

Programi i Aleancës Kuqezi si edhe retorika patriotike e kreut të saj, Kreshnik Spahiu duke mbledhur rreth shumë mbështetës, po venë jo pak në vështirësi (të paktën në dukje) klasën e politike të vendit. Përpos sulmeve verbale, kësaj të fundit i është dashur të impostohet pakëz kah simboleve kombëtare për të mos u dukur “out fare” në raport me frymën e krijuar nga AKZ.

Në programin Fiks Fare kanë filmuar një bisedë me një polic të komisariatit të Lezhës, dhe ky i fundit, në momente shkujdesjeje, i sigurtë që është ‘larg syve të botës e larg veshëve të shefave”, bën disa pohime, që tregojnë se në ç’gjendje ëhstë policia e Republikës. “Kemi katër ditë pa naftë, dhe vijmë vërdallë në këmbë në ndjekje të krimit”, thotë ai fillimisht. Por di t’i mbrojë ‘ngjyrat e skuadrës së vet’; në mënyrën e vet, kuptohet: “Vetëm policia nuk është e korruptuar në asnjë lloj gjëje, kurrkund në botë s’kena me çfarë të abuzojmë.

Në një artikull të botuar në gazetën Tema, Rrok Rroku, kandidati për kryetar komune në Dajç, ka shpieguar me hollësi se si në kutitë e votimit në atë komunë u futën vota fiktive – pra, të njerzve që s’kanë qenë fare në Shqipëri në 8 majin e kaluar. Deri tani, Prokuroria e Lezhës ka çuar dosje penale në gjykatë vetëm për njërën nga kutitë e votimit.