Arkiv-Lajme të përditësuara

Prokuroria e Krimeve të Rënda ka mbyllur dosjen duke dërguar për gjykim Tomorr Zeqon nga Ura Vajgurore, i akuzuar për veprën penale të “vrasjes për shkak të marrëdhënieve familjare”.

Sipas organit të akuzës, nga hetimi ka rezultuar se Zeqo, mesnatën e 4 gushtit të këtij viti, ka dhunuar fizikisht bashkëshorten e tij Mimoza, dhe e detyroi atë më pas të pijë me dhunëfostoksinë.

Prokuroria ngre dyshimin se shkak i këtij krimi ka qenë fakti, që i pandehuri e akuzonte bashkëshorten e tij për tradhti.

Një shqiptar dhe një italian kanë rënë në pranga të policisë italiane, ndërsa janë kapur me 6 kg kokainë të pastër.
 
Shqiptari Lorenc Bushi, 36 vjeç dhe italiani Michele Ciriello, 35 vjeç, prej kohësh ishin nën vëzhgim nga policia pasi kishte informacione për një rrjet trafikantësh të lëndëve narkotike në provincën e Pavia.
 

Tetë gardianë të burgut të Sigurisë së Lartë në Drejtovë janë shkarkuar nga detyra pasi rezultojnë debitorë të energjisë elektrike. Për shkak të mospagesave të faturave të energjisë elektrike, 6 gardianë dhe 2 oficerë të burgut Drenovë kanë në total 800 mijë Lekë borxhe ndaj OSHEE.

Disa ditë më parë rreth 234 punonjës të OSHEE-së të cilët nuk kishin paguar energjinë elektrike prej mbi 2 muajsh, u shkarkuan nga detyra. E njëjta situatë ndodhi edhe me 131 punonjës së policisë së burgjeve të cilët u konstatua se nuk paguanin energjinë ndër vite.

Një arkivol hekuri është gjetur nga policia në varrezat e qytetit të Korçës. Në fillim u dyshua se brenda tij kishte lëndë plasëse, por nga hetimet rezultoi se kishte disa sende pa vlerë. Sipas policisë pas kontrollit brenda në arkivol kishte letra me shkrime fetare.

Arkivoli ishte futur në një gropë të hapur më parë. Në vendin e ngjarjes është prokurori i rrethit dhe policia, e ndërsa pavarësisht se brenda arkivolit nuk kishte lëndë shpërthyese lidhur me dinamikën e ngjarjes vazhdojnë hetimet.

Një 33-vjeçar nga Tropoja është arrestuar ditën e sotme pasi i janë gjetur 120 kallëpe me tritol. Abedin Osmanaj, banues në fshatin Degë, është arrestuar në flagrancë teksa po transportonte me automjetin e tij 100 kapsolla, 150 metër fitil, dhe 2 kuti me nga 24 kg secila të cilat përmbanin në total 120 kallëpe tritoli.

Ndërkaq, në prangat e policisë është vënë edhe 53-vjeçari Myftar Vata, i cili ishte magazinier i subjektit të licencuar, pasi ka shitur lëndën plasëse në kundërshtim me rregullat e vendosura për shitjen e kësaj lënde, të parashikuar nga neni 282 i Kodit Penal.

Ndërtimi i një objekti pa leje në Komunën e Parisit ka dëmtuar një tel elektrik duke u bërë shkak për lënien pa energji të disa zonave në kryeqytet.

Operatori i Shpërndarjes së Energjisë Elektrike njoftoi se gjatë orëve të mbrëmjes së sotme është dëmtuar fidri 323 në nënstacionin elektrik në Selitë duke lënë pa energji elektrike zonat përrethe kopshtit zoologjik, Komunën e Parisit si dhe një pjesë të farkës.

OSHEE po punon për rikthimin e energjisë elektrike. 

Bllokimi i aksit nacional Tiranë-Elbasan ditën e sotme si rrjedhojë e rrëshqitjes së dheut në fshatin Ibë ka sjellë edhe rritjen abuzive të çmimeve nga ana e shoferëve të autobuzëve të linjës duke e çuar biletën nga 150 lekë që është normalisht, në 300 lekë.
 
Kjo për shkak edhe të devijimit të rrugës, pasi siç është njoftuar edhe nga policia e shtetit, momentalisht aksi nacional është i pakalueshëm ndërsa këshillohet që drejtuesit e automjeteve të drejtohen për nga Durrësi për të bërë të mundur mbërritjen në Elbasan si dhe anasjelltas.
 

Një sherr për motive ende të pazbardhura ka ndodhur në një lokal në zonën e Porcelanit në Tiranë. Truproja e sigurisë së këtij lokali është konfrontuar fizikisht me një klient, i cili nga goditjet e marra ka humbur ndenjat.

Ai ka qëndruar për disa minuta i shtrirë në rrugë, cka ka detyruar banorët të njoftojnë policinë me dyshimin se mund të bëhej fjalë për të vdekur.

Ai është dërguar në spital për mjekim.

Ministria e Transportit dhe Infrastrukturës ka njoftuar se rruga Tiranë-Elbasan do të jetë e bllokuar deri në një njoftim të dytë. Sipas njoftimit të tyre rrëshqitja në zonën e Ibës para tunelit të Elbasanit ka ndodhur në orën 04:20 të mëngjesit të sotëm.
 
“Janë marrë masat paraprake duke bllokuar trafikun dhe evakuar banorët për arsye sigurie. Trafiku do të mbetet i bllokuar deri në një njoftim të dytë.”- bën të ditur Ministria e Transportit dhe Infrastrukturës
Më tej shtohet se po behet vlerësimi i situatës për të përcaktuar me saktësi thellësinë e rrëshqitjes.

Shërbimi Pyjor i rrethit të Pukës ka pezulluar punimet që po kryhen për ndërtimin e Hidrocentralit të Kabashit dhe Luzmiut. Sipas shërbimit pyjor, punime janë pezulluar përkohësisht pasi kompanitë që po kryejnë investimin u mungon Raporti Teknik.

Prishja dhe rehabilitimi i zonës së pyllëzuar ku do të ndërtohen hidrocentralet duhet të shoqërohet me një raport teknik.