meta

Partitë mbyllën zyrtarisht fushatën zgjedhore dhe tashmë gjithçka do të varet nga vota e 25 qershorit. Dilemat janë të shumta nëse masiviteti i mitingjeve të tre partive kryesore do të reflektohet edhe në rezultatin e së dielës. PS kërkon 71 mandate dhe në funksion të këtij qëllimi ka rritur ndjeshëm retorikën nacionaliste dhe luftën kundër LSI-së, çka do të thotë se Edi Rama në këtë garë shesh si kundërshtar partinë e Ilir Metës dhe jo Partinë Demokratike.

Presidenti i zgjedhur Ilir Meta ka qenë sot sërish në një emission televiziv për të përsëritur mesazhet politike ndaj kryeministrit. Në “Koha për t’u zgjuar” në "News24", Meta që ngjan së fundmi vetëm si kryetar i LSI-së, ka deklaruar se për ditën e zgjedhjeve përgjegjësi mbajnë Rama dhe drejtori i Policisë.

Zgjedhjet në Shqipëri të datës 25 qershor mund t’i japin fund kaosit, Gërdecit, Lazaratit, firmave piramidale, faljes së mijëra kilometrave katror det fqinjit grek, vjedhjeve marramendëse nga ndërtimi i Rrugës së Kombit, vrasjes së protestuesve me duar në xhepa në bulevard, sjelljes servile ndaj Serbisë dhe Greqisë, ndalimit të ndërtimeve kaotike mbi kanale vaditëse apo ato kulluese, eksploatimit të egër të resurseve natyrore për llogari ekskluzivisht private, .... dhe të gjitha këto për fajin e mosfunksionimit të sistemit gjyqësor.

Lexoni se çfarë ka thënë sot kryeministri Edi Rama në Vorë:

"Ne u japim legalizimet dhe nuk e regjistrojnë dot pronën në Hipotekë, sepse hipotekën e ka dikush tjetër. Ne do ua bëjmë titull pronësie, 40 mijë legalizimet që nuk i regjistroni në hipoteka, brenda vitit. Votoni PS-në dhe do marrë fund historia e regjistrimit të pronës. Çdo pronë do regjistrohet dhe çdo titull pronësie do i dorëzohet pronarit".

Partia ka nevojë profesori përgjigjet. Servet Pëllumbi, djali i të cilit kandidon me PS-në ka dhënë një dorë në menaxhimin e problemit Ilir Meta. Në një prononcim për gazetën "Panorama", Pëllumbi ka paralajmëruar Metën me publikimin e " fakteve të padëshirueshme" nëse Meta vijon të deklarojë se ai ka qenë në përballje si askush me Berishën. Duket se presidenti i zgjedhur ka prishur ca nerva derisa ka shkundur edhe moralistin e PS-së që po u thotë shqiptarëve se për Metën ka dosje të cilat ai i njeh. Cila është vlera e këtij morali, e këtij racionalizimi sekretesh dhe shantazhi?

Ilir Meta i është lëshuar një loje politike që i ngjan kumarit ku me një dorë vendos nëse rrënohesh ose fiton shumë. Në këtë lojë ku po artikulon i vetëm tashmë potencialin për destabilizim, ai jo pa qëllim po investon edhe profilin e Presidentit të Shqipërisë, ndonëse është ende i zgjedhur dhe jo i betuar. Paralajmërimi i tij i djeshëm për armatosje të popullsisë, nuk mund të lexohet në asnjë sens normal, përveç se si mesazh kërcënimi për kryeministrin.

Ilir Meta ka marrë përsipër të bëjë jo vetëm detyrën e presidentit dhe kryetarin e LSI-së për zgjedhje, por edhe atë të Drejtorit të  Policisë. Nga Lezha ku vizitoi mbështetësin e LSI-së në fshatin Raboshtë të dhunuar mbrëmë Meta theksoi se nese policia nuk i lidh zagaret qe dhunojne ne fushate atehere populli armatoset.

Llogaria llogari, politika të vejë e të vijë. Ilir Meta po shfaqet në habitatin e vet dhe është i gatshëm të bëj pazarin që i shkon për shtat edhe me postin e presidentit, madje duke i serviur publikisht skemat që ka në mendje. Një deklaratë anormale për një vend normal, por mesa duket normale për një vend anormal si Shqipëria, ku shqiptarëve u ofrohen të tilla opsione, si ky që deklaron Ilir Meta.

Fatos Lubonja shkruan sot në një analizë të vetën që publikohet nga gazeta “Panorama” se kjo është fushata më grotesket e 25 viteve të fundit. Sipas tij kulmi arrin me faktin se parti që kanë qeverisur këtë vend për një çerek shekulli sillen në fushatë si opozitare me atë që kanë gatuar po vetë. Marrëveshja Rama – Basha është sipas analistit në fjalë shkaku I krijimit të kësaj anomalie që në çdo rast sipas tij provon se këta që janë në politikë nuk dinë të bëjnë edhe aq mirë llogari.

LSI është partia që përflitet më shumë për lidhjet klienteliste dhe përfitimin nga paratë publike. Të paktën në nivel perceptimi shihet si forca që operon me kuota punësimi në entet dhe agjencitë publike. 

Rrjeti investigativ BIRN ka zbardhur një prej mënyrave sesi kjo parti financohet nga paratë publike. Kështu për vitin 2016 LSI ka pranuar financim në kundërshtim me Kodin Zgjedhor nga të paktën një donator- njëherazi edhe përfitues i tenderave publikë nga lista me 42 financues.