bota

Rusia po rekruton shtetas kubanë për të luftuar në ushtrinë e saj në Ukrainë. Sipas një investigimi të BBC, pagesa e lartë dhe mundësitë që jep pasaporta ruse janë dy arsyet pse kubanët zgjedhin radhët e ushtrisë ruse.

Këshilltarë dhe pajisje ushtarake ruse kanë mbërritur në Niger, pas lajmit për largimin e forcave amerikane.

Sipas televizionit shtetëror, një grup i parë prej rreth 100 këshilltarësh rusë kishte mbërritur në Niger më 10 prill së bashku me sistemet e mbrojtjes ajrore.

Dy transportues ushtarakë mbërritën të shtunën, sipas Tele Sahel, i cili raporton se Rusia ka dërguar më parë tre aeroplanë mallrash me material ushtarak dhe instruktorë.

Sanksionet që Perëndimi i ka vendosur Rusisë po rëndojnë inidrekt mbi një nga kompanitë më të mëdha shumëkombëshe. Boeing po has vështirësi në prodhimin e avionëve 787 Dreamliner për shkak të mungesës së një komponenti kyç, subjekt i sanksioneve të SHBA ndaj Rusisë, raporton Wall Street Journal.

Hamasit i është propozuar një marrëveshje, ndërsa pritet raundi i ri i bisedimeve në Kajro, me ndërmjetësimin e Egjiptit dhe Katarit.   

Në këmbim të lirimit të pengjeve izraelite, Hamasit i është ofruar armëpushim 40-ditor dhe lirimi i "mundësisht mijëra" të burgosurve palestinezë.

Detajet e propozimit i bëri të ditur sekretari i Jashtëm britanik, David Cameron.

SHBA ka blerë 81 avionë luftarakë të epokës sovjetike nga Kazakistani. Sipas Kyiv Post, të cilës i referohet Bussines Insider, vlera e deklaruar e shitjes është 2.26 milionë dollarë, që do të thotë 19 300 dollarë për avion.

Mendohet se avionët mund të përdoren në Ukrainë, ku të ngjashëm si ai janë ende në shërbim.

Presidenti turk ka shtyrë vizitën në Shtëpinë e Bardhë, e planifikuar për në 9 maj. Lajmin e bën të ditur Anadolu Agency, dike iu referuar një burimi që ka dijeni mbi vendimin. Megjithatë, mbetet e paqartë arsyeja e kësaj shtyrjeje.

Një zyrtar amerikan vuri në dukje se takimi nuk ishte shpallur zyrtarisht.

Uashingtoni do të tërheqë plotësisht trupat nga Nigeri dhe po zhvendos edhe personelin ushtarak të vendosur në Çad, pasi po shqyrton mundësinë e vijimit të misionit antiterrorist të Amerikës në rajonin e Sahelit.

Gjykata më e lartë e Nju Jorkut rrëzoi sot vendimin e dhënë nga një gjykatë e një niveli më të ulët për rastin që shënoi nisjen e lëvizjes MeToo. Gjykata e Apelit hodhi poshtë vendimin që dënonte producentin e Hollivudit, Harvey Weinstein, me burgim për përdhunim.

Gati 282 milionë njerëz në 59 vende u përballën me urinë akute në vitin 2023. Rripi i Gazës është territori me numrin më të madh të njerëzve që kanë vuajtur nga uria vitin e kaluar, sipas një raporti të OKB-së.

Raporti konstaton se në vitin 2023 numri i njerëzve që përballen me urinë akute u rrit me 24 milionë krahasuar me vitin 2022 për shkak të përkeqësimit të fortë të sigurisë ushqimore, veçanërisht në Rripin e Gazës dhe Sudan.

Shënime të gjetura në Ercolanon e sotme, Itali, lokalizojnë vendin ku është varrosur Platoni (427 – 348 p.e.s.). Së bashku me qytetin e afërt të Pompeit, Herculaneum u shkatërrua gjatë shpërthimit vullkanik të Vezuvit në vitin 79 pas Krishtit, duke e varrosur qytetin nën shtresa të trasha hiri.