Politikë

Ndonëse në nivel politik marrëveshja për kufirin detar me Greqinë quhet parimisht e mbyllur grupet negociatore janë takuar sërish në Athinë për të kolauduar termat e paktit që i jep fund disa problemeve me fqinjin tonë jugor. 
Mediat greke kanë raportuar se është arritur dakordësia në disa çështje, por pa dhënë më shumë detaje se ku është tërhequr pala greke ose ajo shqiptare në çështjen e detit. Negociatat kanë qenë shumë diskrete dhe nga sa mësohet nuk janë mbyllur ende por vazhdojnë. 

Tirana dhe Athina po shkojnë drejt nënshkrimit të një marrëveshje brenda 24 orëve të ardhshme dhe para mbledhjes së Këshillit të Ministrave të Jashtëm të BE-së nëse gjithçka shkon sipas parashikimeve. Kështu shkruan gazeta e njohur greke Kathimerini, duke iu referuar bisedimeve të ministrave Kotzias e Bushati të nisura të enjten në Rodos. Dakordësinë për çështjet e mbetura, kufirin detar dhe shfuqizimin e ligjit të luftës  e konfirmoi edhe kryeministri Rama, i cili foli për një rezultat më të mirë se marrëveshja për Zonat Ekskluzive Ekonomike në vitin 2009. 

Ish-ambasadori grek në Shqipëri dhe në Maqedoni, Alexandros Mallias vlerëson se faktori shqiptar në Maqedoni është shumë i rëndësishëm dhe ishte pikërisht ai që shtyu qeverinë Zaev drejt kërkimit të një zgjedhjeje dhe marrëveshjeje me Greqinë. Në një intervistë për “TemA TV”, Mallias shprehet se Greqia dhe Shqipëria janë në një fazë të pjekur të bisedimeve mes tyre, por zgjidhjet që duhen bërë janë kompromise të vështira.

Opozita greke ka bërë thirrje për një debat të plotë në parlament para nënshkrimit të çdo marrëveshje me Shqipërinë, për të shmangur sipas saj çdo precedent si ai me Maqedoninë.

Sekretari i Demokracisë së Re, George Kumutsakos kërkoi sqarime për rangun e temave që janë në tryezën e  diskutimeve të Kotzias me homologun e tij shqiptar, Ditmir Bushati.

Qeveria shqiptare e Edi Ramës e ka humbur edhe njëhere besueshmërinë e vet kësaj radhe në diskutimin publik për ngritjen ose jo të një kampi refugjatësh në Shqipëri. Mediat e huaja përgënjeshtrojnë thuajse çdo ditë zyrtarët e qeverisë me lajme ku vendi ynë përmendet përherë e më shumë në kontekstin e një koshi shpëtimi për politikën e brendshme austriake dhe nevojat politike të një poli të djathtë që ka marrë frenat në disa vende.

Deklarata e kryeministrit Rama për “Anadolu Agency’ se qeveria po ndjek me vëmendje institucionet arsimore të Gylenit, ngjall opinione të kundërta në Tiranë. Hajro Limaj, drejtues i Institutit të Politikave të Sigurisë Shqiptare thotë se ky survejim është i panevojshëm, ndërsa Ermir Gjinishi,  Ish-nënkryetari i Komunitetit Mysliman e vlerëson këtë organizatë si kërcënim për vendin.

Seanca dëgjimore në Komisionin e Medias për projektligjin për zhvillimin e zonës ku ndodhet Teatri Kombëtar është mbërthyer nga debate për shkak se në të ka hyrë si xhol Kryetari i Bashkisë së Tiranës, Erjon Veliaj. Ministrja e Kulturës Mirela Kumbaro, e cila ishte thirrur në seancë, ka preferuar të heshtë dhe të marrë si engjëll mbrojtës Veliajn, që ka bërë zhurmuesin. Albana Vokshi, kryetare e Komisionit, ka deklaruar se Veliaj është thirrur të mërkurën.

Shfaqja ku kryeministri Rama u shfaq me krerët e komuniteteve fetare duket parakaluar në mes të Parisit është një kartolinë që tani i duhet qeverisë për të lobuar për hapjen e negociatave.

Nuk dihet ende se e kujt ishte ideja, por një rekomandim nga komunitetet fetare do t’i shkojë Brukselit për t’i dhënë Shqipërisë këtë status. Ministria e Jashtme njoftoi se krerët e bashkësive fetarë në Shqipëri i bëjnë apel kancelares Merkel dhe Presidentit Macron të mbështesin hapjen e negociatave me Shqipërinë.

"Tani do të vazhdojmë me negociatat me Shqipërinë". Kjo ishte deklrata e ministrit të Jashtëm grek, Nikos Kotzias pas nënshkrimit të marrëveshjes historike për emrin Maqedonisë. 
"Vendi duhet të shpëtojë nga ngarkesat e së kaluarës dhe të merret me të ardhmen dhe armiqtë e vërtetë"- shtoi në tej shefi i diplomacisë greke. 

Arritja e marrëveshjes për emrin e Maqedonisë sipas revistës Foreign Policy meriton çmimin “Nobel” për Paqen. “Dy liderët që meritojnë Çmimin Nobel për Paqen nuk u takuan këtë javë në Singapor. Ata do të takohen të dielën në kufirin mes Greqisë, Maqedonisë dhe Shqipërisë”-shkruan revista. Më tej thuhet se kryeministrat Alexis Cipras dhe Zoran Zaev do të nënshkruajnë arritjen e marrëveshjes për zgjidhjen e konfliktit afatgjatë mbi emrin e Maqedonisë. Vendi ballkanik sipas marrëveshjes do të njihet me emrin "Republika e Maqedonisë Veriore"