Lajme

Paga e re minimale është një çështje ende në diskutim në Ministria e Mirëqenies Sociale dhe Rinisë dhe Financave dhe nuk është vendosur ende nëse do ta ndryshojnë apo jo. Aktualisht paga minimale për efekt të llogaritjes së kontributeve të sigurimeve shoqërore është 22 mijë lekë. “Monitor” shkruan se pas pas vendimit të fundit të qeverisë për indeksimin e pensioneve me 1.4%, pritet që të vendoset edhe për pagën minimale për efekt të llogaritjes së kontributeve të sigurimeve shoqërore, nëse ajo do të ndryshojë (rritet) apo do të mbetet njëlloj.

Deputeti Arben Ndoka, e ka parë të arsyeshme të bëjë disa sqarime rreth të kaluarës së tij pas publikimit të raportit të DASH ku ai përmendet si një person që ka fituar mandatin e deputetit edhe pse  ka qenë i dënuar për trafik të qënieve njerëzore.

Ndoka e quan aksident dënimin e tij nga gjykatat italiane për shfrytëzim prostitucioni dhe thotë se ai ka rënë viktimë e një kurthi, duke shpresuar se do ta pastrojë figurën e tij.

Ish-kryeministri dhe ish-presidenti i Shqipërisë, Sali Berisha, publikoi dje në profilin e vet në “Facebook”, një shkrim të gjatë lidhur me situatën në Maqedoni. Berisha bën një paraqitje të shkurtër historike, ku sjell edhe disa kujtime të vetat nga takime me zyrtarë amerikanë, si ish-sekretari i Shtetit, Igëllberger, apo me ish-presidentin francez Miteran. Po kështu Berisha vlerëson lart rolin e ish-presidentit maqedonas, Gligorov, për të shtuar se armiqësia e madhe që ushqen te fqinjët brishtësia e këtij shteti në rajon, cenon paqen.

“Vizion Plus” ka zbardhur sot disa propozime që ekspertët kanë bërë në kuadër të reformës së sistemit të drejtësisë. Një propozim është për prokurorinë: “Sipas ekspertëve duhet ndërhyrë në kushtetutë për numrin një të organit të akuzës. “Ndryshimin e procesit të emërimit të Prokurorit të Përgjithshëm, duke i atribuar këshillit të prokurorisë të drejtën për t’i propozuar presidentit dy kandidatë të kualifikuar””, rëportn VP. Po kështu propozohet një ligj për Presidentin e Republikës, i cili bashkë me ministrin e Drejtësisë, mendohet të mos jetë më pjesë e Këshillit të Lartë të Drejtësisë.

Ndeshja Shqipëri-Serbi, e vlefshme në kuadër të eliminatoreve për kampionatin Europian të Futbollit, do të luhet në “Elbasan Arena”. Lajmi përcillet nga “News24” që citon Federatën Shqiptare të Futbollit. Nuk jepen arsyet e ndryshimit të stadiumit, por më herët ishte bërë e ditur se pala shqiptare ka menduar të aplikojë disa kritere sigurie për shitjen e viletave, siç është kërkesa për kartë identiteti. Po kështu stadiumi “Loro Boriçi” i Shkodrës, ku ishte parashikuar zhvillimi i ndeshjes, ka qenë në proces rehabilitimi gjatë këtyre kohëve.

Në Tiranë ka nisur të përhapet praktika e këmbimit valutor kundrejt komisioneve. Prej disa vitesh, kanë qenë vetëm disa agjenci që e aplikonin këtë gjë, por së fundmi, siç raporton “Monitor”, kjo prirje është zgjeruar. Komisioni shkon deri në 8% për blerjen e valutës dhe nuk aplikohet në shitje nga agjencitë. Apeli për qytetarët është që të tregohen të vëmendshëm, pasi veprimi i kryer vështirë të kthehet, pasi ka patur jo pak raste deri edhe të përplasjeve. Disa agjenci së fundmi kanë nisur të afishojnë aplikimin e komisioneve.

Krahu i djathtë i Erion Veliajt në bashkinë e Tiranës me shumë gjasë do të jetë një nga bashkëpunëtorët e e tij më ngushtë në drejtimin e Lëvizjes "Mjaft". Bëhet fjalë për zv/ministrin aktual të Arsimit, Arbën Mazniku, i përfolur së fundmi për abuzime, të gjetura nga kontrolli i Kontrollit të Lartë të Shtetit.

I vetmi deputet i Shqipërisë i dënuar për trafik të qenieve njerëzore, me qëllim shfrytëzimin për prostitucion është Arben Ndoka. Dosja e deputetit socialist të Lezhës u publikua më 12 korrik të vitit 2014 nga Partia Demokratike. Ai rezulton i dënuar me 7 vjet e 5 muaj burg nga gjykata e Romës, shkruan “lapsi.al”. Edhe pas publikimit të këtij skandali që i tregonte botë se në Parlamentin e Shqipërisë kishte hyrë një i dënuar për favorizim prostitucioni, nga Partia Socialiste nuk pati asnjë reagim.

Erion Veliaj do të marrë detyrën ditën e enjte me 30 korrik gjatë një ceremonie ku të pranishëm do të jenë edhe drejtuesit aktualë të Bashkisë. Ai do të gjejë në tryezën e tij të punës si Kryebashkiak projekte të lëna gati nga paraardhësi i tij Lulzim Basha. Në një intervistë për “Ora News”, nënkryetarja e Bashkisë Nevila Xhindi thotë se Veliaj do të gjejë dy pasuri në Bashkinë e Tiranës, njëra është asetet njerëzore, Drejtorët e Bashkisë së Tiranës do të jenë aty dhe thesari i dytë janë 110 projekte.

Pas eksporteve edhe importet kanë pësuar rënie për këtë vit. Importet janë tkurrur me 1.2% për 6 mujorin e parë të këtij viti, duke përshpejtuar ritmet e rënies. “Monitor” shkruan se e kombinuar kjo me rënien e eksporteve, ky është një tregues i ngadalësimit të aktivitetit të tregtisë në vend. Sipas të dhënave të INSTAT, importet në total për 6 mujorin e parë ishin 255 miliardë lekë, me një rënie prej 1.2% në krahasim me të njëjtën periudhë të një viti më parë.