Lajme

Nga shtatori 2015 do të ashpërsohet dënimi për këdo që do të presë në mënyrë të paligjshme apo do të transportojë lëndë drusore në mënyrë të paligjshme. Nuk do të ketë më gjoba por dënime me burg. Ministri i Brendshëm Saimir Tahiri e paralajmëroi në aktivitetin e sotëm ku u prezantua sistemi elektronik i monitorimit me kamera të pyjeve. Tahiri paralajmëroi dhe ndëshkim për policët që nuk do të kryejnë detyrën me ndalimin e kësaj vepre penale. Sistemi elektronik do të shërbejë dhe si provë në proceset gjyqësore për të ndëshkuar punonjësit e policisë që mbyllin sytë para kësaj vepre penale.

Korrupsioni i kushton Kosovës mbi 100 milionë euro humbje çdo vit, vlerësojnë përfaqësues të shoqërisë civile dhe shoqatave ekonomike në vend. Mbi 20 për qind e të gjitha vlerave të kontratave të tenderimit që bëhen brenda vitit, sipas hulumtimeve të bëra, keqpërdoren nga zyrtarë të institucioneve të Kosovës. Fidan Kalaja, nga Lëvizja “FOL”, e cila merret me matjen e luftës anti-korrupsion, i ka thënë Radios “Evropa e Lirë” se në bazë të hulumtimeve që kanë bërë del se njëri nga sektorët më të korruptuar në Kosovë është fusha e prokurimit dhe procesi i privatizimit.

Qendra për Zhvillim Ndërkombëtar në Universitetin e Harvardit dhe një grup studiuesish të saj publikuan në Tiranë një seri studimesh mbi zhvillimin e qëndrueshëm të ekonomisë shqiptare dhe sfidat e rritjes së saj, informon “Zëri i Amerikës”. Drejtuesi i “Ekipit Shqipëria”, profesor Rikardo Hausman, theksoi se Shqipëria duhet të kujdeset më shumë për mikroekonominë, sepse të dhënat makro-ekonomike si inflacioni apo shpenzimet janë të qëndrueshme.

Çmimet e naftës në bursat ndërkombëtare kanë rënë gjatë kësaj jave në nivelin më të ulët që nga shkurti i këtij viti, duke zbritur deri në 52.28 dollarë, raporton “Monitor”. Në raport me fillimin e këtij viti, nafta në vend është rritur me 18%. Nëse ajo do të shtrenjtohet sërish në bursat ndërkombëtare, atëhere karburanti në tregun vendas duket se do të shkojë drejt një ekuilibri dhe rekordi të ri, mbi 200 lekë/litër.

Sot Erjon Veliaj është betuar si kryetar i Bashkisë së Tiranës. Po përcjellim më poshtë fjalën e mbajtur prej tij me këtë rast:

Sot është një ditë shumë e veçantë për te gjithë ne sepse nga sot kemi privilegjin t’i shërbejmë qytetarëve të Tiranës me kohë të plotë.

Ky është një moment kthese në punët e kryeqytetit! Nga tani Bashkia e Tiranës do të ketë një model të ri qeverisjeje, i cili bazohet mbi një parim të thjeshtë: me qytetarin, për qytetarin.

Kryeministri Edi Rama, ka mohuar se do të ketë ndryshime në qeveri në muajin shtator. “Rifreskimin qeveria do ta bëjë gjatë muajve të gushtit. Çdo qeveritar do shkojë të freskohet në gusht e do vijë i freskët në punë. Nuk kemi ndërmend ndryshime në qeveri. Në shtator do të fillojmë një tjetër aksion të madh që do jetë i ngjashëm me atë të energjisë, territorit, mbylljes së universiteteve, etj.. Sa i takon natyrës dhe ashpërsisë, do të jetë aksioni kundër informalitetit.

I dënuar një vit më parë me 2 vjet burgim për veprat penale të "Falsifikimit të dokumentave" dhe "Mashtrimit" dhe i shpallur në kërkim nga ana e Seksionit të Krimit Ekonomik e Financiar në Drejtorine e Policise së Tiranës, Klevis Bitro u ndalua nga forcat e policisë. Ish-drejtori i Kabinetit të Ministrise së Punës po ashtu është dënuar dënuar me 10 muaj burgim për veprën penale “Shpërdorim i detyrës”, ndërkohë është nën hetim një tjetër procedim penal ndaj tij për veprën penale “Fallsifikimi i dokumentave”.

Prania e ministrit të Pushtetit Vendor Bledi Çuçi në mbledhjen parë të Këshillit Bashkiak të Tiranës është bërë mollë sherri mes këshilltarëve të majtë dhe atyre të djathtë dhe ka prishur ceremoninë e betimit të kryebashkiakut të ri, Erion Veliaj.

Mobiljet e reja të Kryetarit të Bashkisë duket sikur të të kujton dhe përrallën “Rrobat e reja të mbretit”. Në fakt kryetari i ri i Bashkisë së Tiranës, Erion Veliaj, do të hyjë sot në zyrën e tij të rimobiluar. Para se të merrte detyrën, Veliaj është marrë vetë me arredimin e zyrës së kryetarit të Bashkisë, nga ku ai do të drejtojë për katër vitet e ardhshme kryeqytetin. Mësohet se puna ka nisur dy ditë më parë, ku zyrës së kryetarit të Bashkisë i është ndërruar krejtësisht pamja, shkruan “Panorama”.

Rikthehen netët e errësirës, por dhe ditët ku njerëzve u duhet të durojnë temperaturat e larta të këtij fundkorriku.Kjo nuk është ndonjë gjë e pazakontë për shqiptarët por gjithsesi vitet e fundit ishin mësuar me një sistem më të rregullt të furnizimit me energji dhe mungesa e saj tanimë shkakton alarm. Zona e Kinostudios në Tiranë ka qenë pa energji elektrike. “Lapsi.al” shkruan se ka mësuar që ndërpreja ka zgjatur për më shumë se 9 orë. Por kjo nuk ka qenë zona e vetme pa energji. Kufizime me orë të tëra ka pasur edhe në disa zona në veri të vendit.