Lajme

“Amnesty International” ka nisur një letër në adresë të Avokatit të Popullit, Igli Tototzani, ku shpreh shqetësimin dhe dënon dhunën e ushtruar ndaj komunitetit rom.  Fjala është për lëvizjen e një komuniteti nga zona e Liqenit Artificial, pas një incidenti që ndodhi me një shtetas gjerman.

Ambasadori i Shqipërisë në OSBE, Spiro Koçi, e ka lënë detyrën e tij. Ai ka thënë në një prononcim për gazetën “Panorama” se ndodhet në Tiranë, por pa sqaruar se në cilat rrethana është bërë largimi. “Për këto çështje kontaktoni me Presidencën dhe Ministrinë e Jashtëm”, thotë Koçi. Po sipas kësaj gazete Spiro Koçit i është ofruar një vend pune si këshilltar pranë Kuvendit të Shqipërisë.

Berisha ka hedhur poshtë zërat për një bashkëpunim politik mes tij dhe kryetarit të Kuvendit, Ilir Meta. Në një intervistë në emisionin “Studio e Hapur” të Eni Vasilit në “News 24”, ish­kryeministri ka përjashtuar mundësinë edhe të një bashkëpunimi politik mes kreut të PD­së Basha dhe Kryeministrit Rama. “Trokitja e gotave, aty ku ka qenë për shembull edhe ambasadori kinez, unë nuk mund të kthej shpinën. Meta nuk ka kërkuar dhe nuk kërkon pakte të reja. Unë kam vlerësuar qëndrimin e tij për hetimin ndërkombëtar. Aferën “DIA” e përdori Rama kundër Metës në mënyrë më të fuqishme.

Tensionet mes izralitëve dhe palestinezëve vijojnë të prodhojnë skena të papranueshme duke dëshmuar për urrejtjen totale. Në një video të shpërndarë së fundmi, shihet një djalë palestinez, 13 vjeç, i identifikuar si Ahmad Saleh Manasra, i cili është plagosur nga disa ushtarë izraelitë dhe lihet të vdesë në rrugë nga plagët. Nuk i jepet ndihma e parë, madje nga raportimet thuhet se edhe kalimtaërt e shajnë. Ai qëllua në ngulimin Pisgat Zeev në lindje të Jerusalemit, pasi sipas izraelitëve ai qëlloi me thikë një prej banorëve të zonës.

“Foreign Policy” sjell pamjet ekskluzive të asaj që mbetet nga spitali i Kundusit në Afganistan, ku humbën jetën 22 persona dhe 12 të tjerë pjesë e stafit, si dhe u plagosën 37 të tjerë. Spitali i përkiste “Mjekëve pa kufij” dhe u bombardua nga forcat amerikane që ishin njoftuar se aty ndodheshin talebanë. Presidenti amerikan Barack Obama kërkoi falje për ngjarjen më 8 tetor, vetëm 5 ditë pasi ajo kishte ndodhur.

PlayBoy, revista e mirënjohur erotike nuk do të publikojë më imazhe të femrave nudo. Ky lajm është bërë publik nga Neë York Times dhe ka bërë bujë në SHBA. Pas këtij vendimi qëndron përvoja pozitive e faqes online, e cila ka njohur rritje në shikueshmëri nga një shjumicë të rinjsh. Ka një vit që në faqe nuk ekspozohen foto nudo dhe sërish pesha e faqes ka ardhur në rritje. Sipas drejtuesit Scott Flanders kjo përvojë mund të zgjerohet edhe më tej, pasi revista mund të kthehet në mjet për shitjen e shumë produkteve.

Agjencia “Ina” raporton për një akuzë publike që i është bërë kreut të Bashkimit Demokratik për Integrim, Ali Ahmeti, e cila e bën atë përgjegjës për likujdimin fizik të Jusuf Gërvallës, Bardhosh Gërvallës dhe Kadri Zekës. Akuzat i ka bërë gazetari Zoran Bozhinovski, që cilësohet ‘kontrovers’, por që ka publikuar disa faksimile. Në dokumentet e parqaitura, siç raporton “Ina”, Ahmeti trajtohet si agjent i dyfishtë me nofkën Ibar.

Shefi i zyrës së FMN-së në vendin tonë, Jens Reinke, sugjeron që Banka e Shqipërisë dhe qeveria të ecë përpara në zgjidhjen e kredive me probleme, duke aplikuar edhe falimentin.

Ish-kryeministri Sali Berisha ka folur për situatën aktuale në Partinë Demokratike, pas zërave për një përplasje mes ish-ministrave të qeverisë Berisha dhe kryetarit Lulzim Basha.

Ish-kryeministri mohoi të ketë një krisje në partinë më të madhe të opozitës duke thënë se ndarja që përflitet mes grupit të Lulzim Bashës dhe gardës së vjetër nuk ekziston. “Është vetëm një perceptim që një grup të rinjsh në Partinë Demokratike kanë një distancë me ministrat e qeverisë sime. Kjo nuk është e vërtetë”-ka theksuar Berisha në një intervistë për emisionin Studio e Hapur në News 24.

Kryetari i Partisë Demokratike, Lulzim Basha ka urdhëruar zhvillimin e zgjedhjeve në Forumin Rinor të Partisë Demokratike, për herë të parë pas 14 viteve. Të gjitha degëve në rrethe u është shpërndarë Udhëzimi për Organizimin e Zgjedhjeve për Organet Drejtuese të Forumit Rinor, material i cili i hap rrugën zgjedhjeve për kryetarin e ri të Forumit e strukturave të tjera.