Politikë

Ministri i jashtëm shqiptar, Ditmir Bushati dhe homologu i tij grek Nikos Kotzias do të nisin të enjten takimin disaditor në Kretë, për të zgjidhur çështje të klasifikuara si të “vështira” mes dy vendeve. Takimin e konfirmoi për gazetën lokale Flash News.gr kryetari i bashkisë se Spithas ku do të mbahet takimi, Ioanis Stefanakis.

Lulzim Basha denoncoi të hënën përfshirjen e Paulin Ndreut, (vëllait të deputetit socialist, Pjerin Ndreu) në procedurat për lëshimin e dy patentave lundruese në emër të ish-ministrit të Brendshëm Sajmir Tahiri.

Ekspertja britanike Anna Khodabandeh, një ish-muxhahedine e kampit MEK në Iran ka ardhur në Tiranë për të bindur çdokënd që opozita iraniane nuk është ajo që duket. Në një intervistë ekskluzive për Tema TV ajo lëshon disa mesazhe. Mes të tjerave ajo thotë se MEK po tenton të mbledhë rreth vetes rininë shqiptare.

PD ka përshkallëzuar qëndrimin e saj në raport me shumicën socialiste, duke vendosur të bllokojë reformën zgjedhore dhe të përqëndrojë të gjitha energjitë në denoncimin e lidhjeve të qeverisë me krimin.

“Reforma zgjedhore do të fillojë atëherë kur vendi të ketë një qeveri antimafia, e cila në vend që të përdorë kriminelët dhe paratë e drogës për të blerë vota, t’i çojë ata para drejtësisë dhe ti lerë shqiptarët të vendosin të lirë me votën e tyre qeverisjen dhe qeverinë që dëshirojnë”

Partia Socialiste dhe pas saj qeveria po luajnë në mbrojtje në rastin e Saimir Tahirit. Ky do të ishte një lajm i mirë nëse nuk do të shikonim një sjellje që të kujton Sali Berishën e 21 janarit 2011. 

Në përpjekjen për të goditur me një dosje opozitën që sot ushtron presion për çështjen “Tahiri”, socialistët ndjejnë se janë të bllokuar në kundërveprimin e tyre nga prokuroria. Kryetari i Grupit Parlamentar, Taulant Balla, akuzoi sot organin e akuzës se po përdoret politikisht.

Presidenti i Kosovës, Hashim Thaçi i ka akorduar kreut të Kuvendit të Shqipërisë dekoratën “Urdhri i Lirisë”, me motivacionin “Për kontributin e dhënë për lirinë dhe pavarësinë e Kosovës”. 

“Kontributi për lirinë e Kosovës nuk i përket asnjë individi. Ndihem shumë i vlerësuar për medaljen e lartë të shtetit të Kosovës. Vlerësimi që më dedikohet e ndaj dhe ua dedikoj të gjithë bashkatdhetarëve të mi në Shqipëri. Këtë vlerësim do ua përcjell të gjithë deputetëve të Kuvendit të Shqipërisë. Pavarësia e Kosovës ka qenë gjithmonë një ëndërr e të gjithë shqiptarëve”, tha Ruçi. 

Panajot Barka, opinionist dhe publicist që shkruan shpesh për çështjet e minoritetit grek në Shqipëri, ka publikuar një opinion për lëvizjet e fundit të ministrit të Jashtëm, Ditmir Bushati. Barka merr në shqyrtim itinerarin e javës së kaluar të Bushatit nga Derviçani  në Kakavijë dhe mandej në Janinë. Vizita e tij përkoi me një situatë të pakëndshme në doganë ku qindra qytetarë ishin bllokuar për shkak të një defekti në sistemin TIMS në Greqi. Por Barka vë në dukje tjetër gjë. Sipas tij, Bushati u bojkotua nga emigrantët shqiptarë në takimin e Janinës dhe kjo për arsye shumë të qarta.

 Shërbimi Informativ i Shtetit ka kundërshtuar përmes përfaqësuesve, buxhetin e akorduar nga qeveria për vitin 2018. Në mbledhjen e mbajtur për këtë çështje në Komisionin Parlamentar të Sigurisë, përfaqësues të SHISH, kanë kundërshtuar fondin 1.5 miliardë lekë duke kërkuar para shtesë për ndërtime godinash, paga dhe përgjime. Report Tv citon burime brenda mbledhjes së Komisionit, sipas të cilave kërkesa e SHISH është pranuar nga deputetët me arsyetimin se kontribuon te siguria kombëtare.

Plot 20 minuta fjalim të kryeministrit Rama në komunikimin e javës për t’iu thënë qytetarëve se më në fund forca e ligjit do të veprojë, pasi do të nisë një operacion për goditjen fatale të krimit të organizuar dhe lidhjeve të tij me politikën, ku do të jenë të përfshirë edhe partnerët ndërkombëtarë.

Gazeta zyrtare e Partisë Demokratike, “Rilindja Demokratike” shkruan sot se ish-ministri i Brendshëm, Sajmir Tahiri, ka qenë të premten në shtëpinë e biznesmenit  Lefter Sota, djali i të cilit është ndaluar nga policia në Elbasan. Sipas kësaj gazete “Tahiri ka kërkuar të qetësojë familjarët e mikut të tij dhe t’u kërkojë që të mos flasin. Mësohet se vizita është bërë rreth orës 21:00..”.