Lajme

Kolarov dhe Llajiç kanë mbyllur ndeshjen me Shqipëri - Serbi, e vlefshme për Europianin, në katër minutat e fundit të saj. Madje në shtesë. Ekipi serb ka marrë kështu një fitore të pastër në Elbasan Arena kundër Shqipërisë, në një nseshje ku përfaqësuesja jonë u paraqit shumë dobët. Në stilin e lojës tradicionale të mbrojtjes me heqje topi, me boshllëqe në mesfushë, pa energji dhe fantazi për të ndërtuar aksione, kombëtarja shqiptare ka lëshuar veten në fund. Dy golat e serbëve erdhën edhe si rezultat i formës më të mirë fizike.

Sot kryeministri i Shqipërisë, Edi Rama, ka folur në Parlament për aferën e CEZ-it. Ka folur gjatë dhe me detaje, ka sqaruar dinamikën e marrëdhënies së CEZ-it me qeverinë shqiptare dhe me kompanitë e mbledhjes së borxheve. Ka sqaruar shqiptarët se afera fsheh pazaret e Sali Berishës, që qëndron sipas tij edhe pas vendimit të ERE-s, në vitin 2010, që uli çmimin e shitjes nga KESH drejt CEZ në 1,48 lekë. Kur vjen puna për hetimin ndërkombëtar, Edi Rama, ka përcjellë besimin që ka fituar te sistemi i drejtësisë në Shqipëri.

Sot Partia Demokratike shpërndan një njoftim për pjesëmarrjen e kryetarit të saj, Lulzim Basha, në ceremoninë familjare të përkujtimit të ditës së lindjes Ahmed Zogut, monarku i Shqipërisë, në periudhën 1928 – 1939. Zogu është një figurë historike e cila është në shqyrtim e sipër, për të është hedhur shumë baltë dhe puna për nxjerrjen në kontesktin e objektivitetit është ende e madhe. Mirëpo kjo vlen fillimisht për historianët, e mandej për politikën, e cila të paktën aspektin formal e ka për detyrë ta ruajë.

Përveç policisë së Shqipërisë, rendin në Elbasan janë duke e ruajtur edhe policia e Kosovës. Sipas raportit të agjesisë së lajmeve “Express”, njësia speciale e Kosovës, “ROSU”, ka udhëtuar drejt Elbasanit për t’iu dalë në ndihmë kolegëve të tyre nga Shqipëria, për ta mbajtur rendin gjatë ndeshjes mes Shqipërisë dhe Serbisë. Mësohet se ardhja e trupave të Policisë së Kosovës është në kuadër të një marrëveshjeje me policinë shqiptare.

E vërtetë tingëllon:

Deklaratat e kandidatit republikan në garën presidenciale amerikane, Donald Trump, kanë acaruar edhe kreun e trafikut të drogës në Meksikë, të famshmin Joaquin "El Chapo" Guzman. Ky i fundit ka deklaruar se do ta shohë të vdekur Trump për deklaratat e veta për imigracionin dhe për ndërtimin e një muri me Meksikën. Lajmi bëhet i ditur nga një revistë amerikane “Complex”. Deri më tani trafikanti meksikan ka ofruar 100 mijë dollarë, por thuhet se ai do të ofrojë çdo lloj shume.

Një gur i hedhur në drejtim të autobusit të ekipit kombëtar serb dhe marrëdhëniet diplomatike janë tronditur. Qesharkja është bërë normale tashmë në raportet serbo-shqiptare, teksa për këtë shkak, Ministria e Jashtme serbe ka përcjellë një notë verbale proteste. Ose më saktë është përpjekur, pasi ambasadori i Shqipërisë në Beograd, Ilir Boçka, është përgjigjur në mënyrë origjinale: nuk ka hapur telefonin.

Është ndarë nga jeta në moshën 64 vjeçare aktori korçar, Marko Bitraku. Ai u lind më 15 Janar të vitit 1951 në Lavdar të Oparit të rrethit të Korçës. Pas mbarimit të studimeve të larta në Institutin e Lartë të Arteve (sot Akademia e Arteve) në vitin 1974 fillon punën si aktor profesionist në Teatrin “Andon Zako Çajupi” të Korçës. Bitraku njihet për disa role në kinema si në filmat: “Mësonjëtorja” në vitin 1979, “Asgjë nuk harrohet” në vitin 1985, “Gjeneral Gramafoni”,“Njerëz në rrymë”, “I dashur armik” në vitin 2004 etj..

Ish kryeministri Sali Berisha dhe kryeministri Edi Rama qëndruan bashkë në foltoren e kuvendit. Ndërsa Berisha lexonte një pjesë nga dokumentet për aferën e CEZ, Edi Rama ka marrë të gjithë vëmendjen e sallës, duke qëndruar në krah të tij. Në fillim, kreu i Kuvendit, Ilir Meta i ka dhënë fjalën Edi Ramës për të folur, por Berisha tashmë ishte nisur nga vendi i tij, me dokumenta në duar. Rama ka preferuar të mos këmbëngulë për të folur i pari, por ka zgjedhur të qëndrojë afër Berishës herë duke parë orën, e herë duke miratuar me kokë, për atë që lexonte Berisha.