Prokuroria

Prokuroria e Përgjithshme shpeshherë ka kërkuar që Qeveria të shtojë fondet për këtë institucion, pasi shpenzimet i ka shumë të larta për procedimet penale dhe hetimet. Gazeta ‘Shqip’ sot ka publikuar shpenzimet e organit të akuzës, të dhëna të cilat janë marrë nga Agjencia e Prokurimit Publik.

Bashkia e Tiranës dhe kryetari i saj, Erion Veliaj janë zyrtarisht objekt i një hetimi për një vepër penale që ka konsumuar aparati drejtues i policisë bashkiake, me aprovimin e eprorëve. Prokuroia pritet të thërrasë për të pyetur disa zyrtarë te bashkisë pas konfirmimit se shkrimi në gjobën që bashkia e Tiranës i vuri Partisë Demokratike per protesten e 8 dhjetorit ishte i falsifikuar.

Prokuroria ka tejkaluar afatin e rekursit për çështjen e ish guvernatorit të Bankës së Shqipërisë Ardian Fullani, duke mos e dërguar atë në Gjykatën e Lartë. Zyrtarisht prokuroria e Apelit pohoi për Top Channel se nuk ka depozituar rekurs në Gjykatën e nivelit të tretë, për të kundërshtuar vendimin e pafajësisë të shpallur më 23 dhjetor nga Kolegji Penal i kësaj gjykate.

Afati për ta kryer këtë veprim ishte deri më 23 janar, ndërkohë që në tejkalim të kësaj periudhe proceduriale meqënëse nuk pati asnjë reagim nga prokuroria, vendimi i pafajësisë për Fullanin merr formë të prerë.

Do të vinte patjetër kjo ditë. Dhe nuk vonoi. Shakaja prej parimori që kryetari i Bashkisë, Erjon Velaij, bëri me gjobën ndaj PD-së pas protestës së 8 dhjetorit, përfundoi në Prokurori. Ekspertimi nxori se teksti i gjobës nuk ishte shkruar nga inspektori Besmir Karaj, që edhe bëri kallëzimin. Firma e tij po, por siç njoftojnë mediat, ka një praktikë, ku blloqet e gjobave mbahen të firmosur dhe mbiu to inspektorët plotësojnë tekstin. Ky është momenti i dyshimtë që mendohet se është shfrytëzuar nga bashkiakët e rinj të Veliajt, i cili e MORI PËRSIPËR përgjegjësinë publikisht.

Lajmi i sotshëm është se Adriatik Llalla, që ushtron detyrën e Prokurorit të Përgjithshëm, ka rezerva për draftin e propozuar në kuadër të reformës në Drejtësi. Llalla ndodhet në Kroaci, ku duket se ka bërë disa vlerësime për ndërhyrjen që bëhet  në organin e akuzës, të cilat nuk i pëlqejnë. “Siç theksohet në njoftimin për shtyp të Prokurorisë së Përgjithshme, paketa kushtetuese parashikon një këshill me një shumicë të brishtë prokurorësh, që do të drejtohet nga një person jashtë sistemit; e për këtë arsye Adriatik Llalla ka rezerva për draftin.

Prokuroria e Pargjithshme urdhëroi arrestimin e gardistëve që më 21 janar 2011 ishin pjesë e repartit mbrojtës të Kryeministrisë dhe Policia e Shtetit nuk e zbatoi urdhrin. Ky akt perceptohet zakonisht si puç, por prokuroria e Adriatik Llallës memdon ndryshe. Për një linjë institucionale veprimi, thuajse automatike, organi i akuzës nuk ka gjetur asnjë përgjegjësi te ish-drejtuesit e Policisë së Shtetit, Hysni Burgaj, Agron Kuliçaj dhe Saimir Muça.

Prokuroria ka caktuar më në fund prokurorin për hetimin e konçesioneve të Ministrisë së Shëndetësisë. Ai do të jetë Endri Bimi. “Me urdhër të drejtuesit të prokurorisë së kryeqytetit, mësohet se dosja i ka kaluar për vazhdim të hetimeve prokurorit Bimi. Ky i fundit, sipas burimet të akuzës, i është drejtuar Ministrisë së Shëndetësisë duke kërkuar dosjet e plota për 3 koncesionet e këtij dikasteri. Ky veprim hetimor, i prokurorisë vjen vetëm pasi kanë kaluar mbi 1 muaj që nga momenti kur zyra e kryeprokurorit Adriatik Llalla njoftoi për nisjen e hetimeve për këto tre koncesione.

Njësia Task-Forcë e Prokurorisë kërkoi dje zyrtarisht nga Ministria e Shëndetësisë dosjet e tri koncesioneve të dhëna nga ky institucion, me vlerë të përgjithshme 306 milionë dollarë.Objekt i hetimi janë koncesioni I Check up-it falas me vlerë rreth 120 milionë euro, sterilizimi i pajisjeve kirurgjikale në spitalet e vendit, me vlerë 100 milionë dollarë dhe koncesioni i shërbimit të hemodializës, me vlerë 86 milionë dollarë.

Prej muajsh tashmë flitet për reformën në drejtësi, me përqendrimin te gjyqësori. Ambasadorët, kryeministri etj., janë hedhur në sulm ndaj korrupsionit në gjykata dhe sidomos ndaj korporatizmit në këtë pushtet, duke paralajmëruar shkundje të ekuilibrave. Eksertët e Partisë Socialiste kanë parashikuar ndryshime institucionale të mëdha, kryqëzim kompetencash dhe më e rëndësishmja, mandate 9 vjeçare apo edhe 12 vjeçare që në raport me legjislativin do të thotë “stabilitet” dhe kontroll për 3 mandate.

Pavarësisht se ka kaluar një muaj qëkurse Prokuroria deklaroi nisjen e hetimeve kryesisht për konçesionet e Ministrisë së Shëndetësisë, procesi ka mbetur në vend. “ABC NEWS” raporton sot se nuk është caktuar ende prokuori i çështjes ku përfshihet edhe ministri i Shëndetësisë, Ilir Beqja. “Edhe pse kanë kaluar mbi 1 muaj nga nisja e këtij hetimi, dosja ndodhet në zyrën e drejtuesit të prokurorisë së kryeqytetit, i cili nuk ia ka deleguar ende njësisë së task-forcës relacionin e fillimit të ndjekjes penale.