bota

Gjithnjë e më shumë pengesa në rrugën e Joe Biden drejt një mandati të dytë në Shtëpinë e Bardhë. Megjithë përpjekjen për të rikuperuar atë që humbi në sytë e opinionit gjatë përballjes me rivalin Trump, Biden mbajti një konferencë shtypi një orëshe. Por pavarësisht se u shfaq në formë më të mirë se në debatin televiziv, presidenti 81-vjeçar bëri sërish gafa dhe këtë herë akoma më të rënda.

Ai iu referua presidentit të Ukrainës, Volodymir Zelensky, si presidenti Putin.

Shkollat ​frëngjishtfolëse të Belgjikës do të ndalojnë telefonat inteligjentë. Qeveria e re e Valones, në marrëveshjen e saj të koalicionit ka përfshirë edhe një plan për të ndaluar telefonat inteligjentë në shkollat e rajonit jugor të Belgjikës, si dhe qindra shkolla në Bruksel.

Plani parashikon ndalimin e plotë të tyre në shkollat ​​fillore, ndërsa në shkollat e mesme kjo do të bëhet gradualisht brenda tre viteve.

Danimarka bëhet vendi i parë që harton një ligj për emetimin e gazeve serrë nga bagëtitë.

Parlamenti me 179 anëtarë, pas një diskutimi me fermerët, kompanitë e sektorit dhe shoqatat mjedisore dhe të konsumatorëve, po shqyrton ligjin e ri, i cili takson fermerët.

Fillimisht, ata do të paguajnë rreth dyzet euro për ton emetime në vit nga viti 2030, taksë që rritet në njëqind euro pas vitit 2035.

Ndryshe nga ajo që pritej, francezët nuk i dhanë shumicën ekstremit të djathtë. Megjithatë, këtë privilegj nuk e kanë më as centristët e presidentit Macron.

Exit pollet por edhe rezultatet e para flasin për një fitore të ngushtë të aleancës së partive të majta, të grupuara nën siglën e Frontit të Ri Popullor, i drejtuar nga Jean-Luc Mélenchon. 

Ushtria gjermane do të mbyllë misionin në bazën e saj ajrore në Niger. Tërheqja do të përfundojë më 31 gusht pas prishjes së bisedimeve me juntën në pushtet të vendit Sahel, bëri të ditur Ministria gjermane e Mbrojtjes.

“Të gjithë ushtarët e Bundeswehr-it të vendosur në bazë do të tërhiqen deri më 31 gusht dhe bashkëpunimi ushtarak gjerman me Nigerin do t'i jepet fund”, saktësohet në deklaratën zyrtare.

Grupimi i ri politik i kryeministrit hungarez në PE ka siguruar numrin e nevojshëm të eurodeputetëve vetëm pak ditë pasi u njoftua nisma për formimin e tij. Në përpjekje për të rritur peshën e së nacionalistëve të djathtë, Viktor Orban njoftoi në fund të qershorit synimin e tij për një grup të ri parlamentar të BE-së, i quajtur “Patriotët për Europën”, duke u zotuar për "një epokë të re" që "do të ndryshojë politikën evropiane".

Rusia nuk e sheh si ndërmjetës të mundshëm presidentin turk, Erdogan.

Ky i fundit, gjatë një takimi që ka pasur me homologun rus në kuadër të samitit të Organizatës së Bashkëpunimit të Shangait (SCO) në Kazakistan, është shprehur se Ankaraja mund të ndihmojë në përfundimin e luftës Ukrainë-Rusi.

Por zëdhënësi i Putinit, Dmitry Peskov, përjashtoi çdo rol si ndërmjetës për liderin turk.

Greqia ka rezerva në lidhje me rezultatet e censit në Shqipëri. Ministri i Jashtëm grek, George Gerapetritis, tha se “rezultatet nxjerrin në pah çështje serioze që lidhen me procesin e regjistrimit, të cilat vënë në pikëpyetje vetë rezultatet".

Edhe Omonoia i kundërshtoi rezultatet e censit, duke theksuar se qeveria nuk ka prodhuar "një rezultat të besueshëm dhe të pranueshëm" në lidhje me numrin e grekëve dhe të krishterëve ortodoksë në Shqipëri.

NATO dëshiron që Ukraina të bëjë më shumë përpjekje për të goditur korrupsionin endemik si kusht për çdo përparim drejt anëtarësimit në bllok, raportoi të martën Daily Telegraph, duke cituar burime.

Sipas gazetës britanike, shqetësimet se Ukraina është "shumë e korruptuar" për t'u bërë një anëtare e plotë e NATO-s do të theksohen në komunikatën në samitin e bllokut në Uashington më 9-11 korrik.

Ushtria britanike është në gjendje kaq të keqe saqë mund të mos jetë e aftë të mbrojë vendin, aq më pak të montojë një forcë ekspedite me ndonjë forcë të rëndësishme, thotë për Financial Times një ish-zyrtar i ngarkuar me vlerësimin e forcave të armatosura.

Rob Johnson, drejtor i Oxford Changing Character of War Centre, u emërua në maj 2022 për një mandat dy-vjeçar si kreu i Zyrës së Ministrisë së Mbrojtjes për Vlerësimin dhe Sfida Neto (SONAC).