Adriano Celentano i bën italianët ta mbajnë në gojë; në të gjitha mënyrat

Adriano Celentano i ka kapur në befasi të gjithë ata, që kanë ngritur këto ditë një zhurmë të madhe mbi honoraret e majme që ka kërkuar në këmbim të pjesëmarrjes në Festivalin e Sanremo-s. “350 mijë euro për një mbrëmje”, kjo është shuma, për të cilën është rënë dakord dhe nga RAI. Është rënë dakord gjithashtu, që ai të vendosë vetë se në sa mbrëmje do të marrë pjesë, dhe shuma, kuptohet, do të jetë 350 mijë shumëzim për numrin e netëve. “Kërkesa të tilla nuk e nderojnë artistin e madh Celentano në këto kohë krize” – ky ka qenë thelbi i mesazheve të një numri njerëzish, përfshirë disa politikanë, për të cilët, drejtuesi i Sanremo-s, Gianni Morandi, thotë se “e përmendin Celentano-n, pasi kështu kanë rast të dalin në lajme”.  

Thamë se Celentano i ka kapur në befasi. Në ç’mënyrë? Sot ai ka njoftuar se të gjitha paratë, që do t’i jepen prej RAI-t, do të shkojnë për bamirësi.  Destinacioni do të jetë një spital, dhe një numër bashkish, të cilat kanë bërë gati, tanimë, një listë me familje në nevojë, që do të përfitojnë nga ky “operacion financiar i papritur”.

Re.Pu.