Blloku Bota

Sekretari britanik i Mbrojtjes, Michael Fallon ka dhënë dorëheqjen pas raportimeve në media për një sjellje të pahijshme të tij ndaj një gazetareje në vitin 2002.

Ai pranoi se sjellja e tij në të kaluarën ishte nën standardet e larta që kërkojnë forcat e armatosura. Më herët gjatë javës ai kërkoi falje për incidentin e ndodhur 15 vite më parë ndaj gazetares Julia Hartley-Brewer, të cilën e kishte prekur në këmbë.

Pasi ndërhyri në favor të Bashar al Assadit dhe i paralizoi zgjidhjet e synuara në konfliktin sirian nga disa vende, përfshirë edhe SHBA-të, Rusia e Vladimir Putinit po hedh një hap tjetër. Ajo ka thirrur një kongres të Dialogut Kombëtar që parashikohet të mbahet më 18 nëntor në Soçi në Detin e Zi dhe mund të thuhet se përbën lëvizjen e parë që Rusia ndërmerr e vetme për të vendosur paqen në Siri.

Kthehet në burg ish-ministri grek i i Mbrojtjes, Akis Tsohaxopulos, i cili kishte fituar lirinë me kusht kundrejt një garancie bankare. Gjykata e Apelit  nuk i njohu asnjë masë lehtësuese ish-ministrit edhe pas problemeve me shëndetin apo sjelljes së mirë në burg. Vendimit të Gjykatës së Shkallës së Parë Apeli i uli vetëm një vit burg duke e çuar dënimin nga 20 në 19 vite burg.

Liderët e Turqisë, Azerbajxhanit dhe Gjeorgjisë kanë përuruar punimet e një linje hekurudhore 826 km të gjatë që do të lidhë Europën me Kinën duke shmangur linjën tradicionale ruse.

Në kryeqytetin azer, Baku, liderët e të trija vendeve kanë vënë simbolkisht binarët e parë të një linje që bën pjesë në aksin kinez të Rrugës së Mëndafshit, por që nuk fsheh synimet strategjike që ta kthejë gjigandin rus në një xhep që qëndron anash atij që mendohet të jetë një korridor tregëtar ndër më të mëdhenjtë në botë.

Bashkimi Europian e cilëson të pavend dhe vendimin e qeverisë serbe për të caktuar në Akademinë Ushtarake, gjeneralin Vladimir Lazareviç, i dënuar për krime lufte në Hagë.

Vizita e ministrit të Jashtëm grek, Nikos Kotzia të mërkurën e kaluar në Ankara shihet si një përpjekje për rikthimin e marrëdhënieve greko-turke në një trajektore normaliteti dhe  shmangien e tensioneve në hapësirën ajrore të Egjeut.

Ministri i jashtëm grek zhvilloi takime me Presidentin e Turqisë, Rexhep Taip Erdogan dhe homologun e  tij turk Mevlüt Çavuşoğlu për gjithë axhendën e marrëdhënieve dypalëshe.

Presidenti i kurdëve të Irakut Marsoud Barzani ka deklaruar se do të japë dorëheqjen më 1 nëntor. Barzani ka përcjellë një mesazh televiziv duke sqaruar se nuk ka ndërmend të vijojë qëndrimin në detyrë përtej kësaj date për asnjë rrethanë. Vendimi vjen pas një referendumi për pavarësi që provokoi tensione në rajon. Forcat Shiite irakene ndërmorën një ofensivë ndaj rajonit kurd duke kapur qytetin e Kirkuk, i njohur për naftën.

Harvey Weinstein duket se ka hapur kutinë e Pandorës për atë që është industria e filmit në ShBA. Akuzat ndaj tij për ngacmime seksuale ndaj aktoreve të reja kanë shkuar tanimë në 50, ndërkohë që kjo histori po nxjerr në dritë edhe përvoja të tjera të ngjashme. Një e tillë është fare e papritur dhe ka të bëjë me aktorin e njohur Kevin Spacey. Ai akuzohet nga Anthony Rapp, aktori 46 vjeçar i serialit Star Trek, I cili në një intervistë për BuzzFeed News, deklaroi se është ngacmuar seksualisht nga Spacey në moshën 14 vjeçare.

Akademia  Kineze e Shkencave ka paralajmëruar Phenianin zyrtar se teste të mëtejshme bërthamore rrezikojnë shembjen e malit Punggye-ri. Informimi mbi këtë çështje është bërë nga Instituti i Gjeologjisë dhe Gjeofizikes i cili a vënë në dispozicion të dhënat e veta për një delegacion koreanoverior që drejtohej nga Lee Doh-sik, kreu i Institutit për Kërkime Gjeologjike. Zona e testimeve është vetëm 80 km nga kufiri kinez dhe mendohet se shembja e malit mund të provokojë një katastropfë të vërtetë.

Belgjika e sheh si opsion real dhënien e azilit politik për presidentin e Katalonjës, Carles Pouigdemond. Qeveria spanjolle i ka hequr atij të gjitha kompetencat pas shpërbërjes Parlamentin e rajonit autonom.

Në të njëjtën kohë, Gjykata Kushtetuese e Spanjës po shqyrton rastin e referendumit për pavarësi, për të përcaktuar nëse ai mund të konsiderohet si rebelim.