Blloku Bota

Dorëheqje e bujshme apo lëvizje taktike? Bepe Grillo duket se ka braktisur Lëvizjen e Pesë Yjeve 5 që ai vetë e themeloi përmes blogut të tij, duke deklaruar se është velur politikisht.
Grillo ka fshirë edhe pjesën më të madhe të postimeve për partinë nga blogu i tij duke ndryshuar profilin dhe u përqëndruar në teknologjinë dhe vizionet e së ardhmes si pjesë e një "aventure çlirimtare". 

Kompania Facebook Inc ka deklaruar në kongresin amerikan se agjentët rusë krijuan 129 ngjarje në rrjet gjatë zgjedhjeve të fundit presidenciale në SHBA. Dëshmia është depozituar me shkrim në formën e një deklarate ka shpjeguar se këto “ngjarje” të gjeneruara në rrjetet sociale u panë nga 338 300 përdorues të ndryshëm të Facebook dhe në to u regjistruan për pjesëmarrje 62 500 përdorues.

Bashkimi Europian i ka vënë kufi kohor të qartë Serbisë për normalizimin e marrëdhënieve me Kosovën. Gazeta serbe, “Vecernje Novosti” raporton se sipas një strategjie të zgjerimit të BE-së që është parë prej saj, BE-ja e konsideron urgjente normalizimin e raporteve mes të dyja vendeve, duke i përcaktuar Serbisë kushtin e anëtarësimit për në BE. Viti 2019 është afati i përcaktuar për Serbinë për përmbushjen e kritereve tranzitore të kapitulli 25 që kanë të bëjnë me Kosovën.

“Nuk do ta shohim më”. Kështu shkruan agjencia ruse “Sputnik” për Brian Hoyt Yee, zyrtarin e lartë të Departamentit Amerikan të Shtetit, i cili provokoi shumë reagime në muajt e fundit me deklaratat e tij në Beograd. Yee, i cili vitin e kaluar ndikoi në zgjidhjen e situatës në Maqedoni, në Shqipëri dhe kërkoi nga Serbia që punonjësve të qendrës humanitare ruse në Nish, të mos i jepet status diplomatik, duket se nuk është më pjesë e DASH. Kështu shkruan “Sputnik” dhe kështu referon edhe B92, një media që e quan veten liberale në Serbi.

Të shmanget çdo veprim që mund të shkaktojë konflikt midis forcave ushtarake turke dhe amerikane në Siri kërkoi Donald Trump ndaj homologut të tij turk.

Kjo është hera e parë që presidenti amerikan bën thirrje haptazi kundër operacioneve ushtarake në Siri, duke i bërë thirrje presidenti turk Erdogan, të tërhiqet nga operacionet kundër kurdëve. 
Presidenti turk nga ana e tij i kërkoi homologut amerikan të ndalonte mbështetjen e SHBA ndaj kurdëve.

Në botën e mediave sociale po fiton terren ligjësia e kapilarizimit të “lajmit”, qoftë ky fals apo blof, çka shpjegon deri diku se përse njerëz shumë aktivë në to kanë sukses. Donald Trump, president i SHBA-së, është padyshim ilustrimi më domethënës i kësaj prirjeje të kohës sonë që likujdon çdo autoritet të establishmentit tradicional mediatik. Trump akuzohet se përhap edhe lajme të rreme, por ato nuk po diskreditohen dot, ndaj edhe lufta ndaj tij po regjistron një intensitet të paprecedentë.

Matteo Salvini, kreu i Lega Nord në Itali  kërcënon se do të dëbojë gjysmë milion refugjatë dhe emigrantë nga vendi i tij nëse do të bëhet kryeministër.

"Ka rreth gjysmë milioni emigrantë të parregullt në Itali. Të gjithë ata duhet të kthehe mbrapsht"-deklaroi Salvini për gazetën La Repubblica, ndërsa Kisha Katolike u ka bërë thirrje partive politike të mos e bazojnë fushatën e tyre zgjedhore mbi emigracionin.

Më shumë se 100 mijë grekë kanë protestuar në Selanik kundër emrit Maqedonia që duket se do të integrohet tek emri i ri ndërkombëtar. Sipas mediave ndërkombëtare protesta nuk asociohet me asnjë parti dhe në të morën pjesë priftërinj, anëtarë të tradeunioneve maqedonase nga Greqia e Veriut, politikanë lokalë, socialistë dhe konservatorë dhe ish-ushtarakë.

“Qëllimi ishte t’i dërgohet një mesazh i qartë IRJM-së që të ndalë së përdoruri “Maqedoninë” në emrin e saj”, raportojnë mediat.

Me 362 pro dhe 279 kundër Kongresi i jashtëzakonshëm i Partisë Socialdemokrate (SPD) në Gjermani miratoi propozimin e lidershipit për të marrë pjesë në negociatat me Bashkimin Kristiandemokrat (CDU / CSU) në mënyrë që të krijojnë një koalicion të madh nën drejtimin e Angela Merkel.

Politika e jashtme e Rusisë pritet të luajë një rol të rëndësishëm në zgjedhjet ruse të marsit të ardhshëm. Së fundmi argumentohet se ndikimi i çështjeve të Ballkanit në formësimin rezultatit të zgjedhjeve nuk do të ketë këtë ndikim për aq kohë sa Rusia jep përshtypjen se ka zgjedhur të distancohet nga zhvillimet e brendshme të shteteve ballkanike.