Blloku Bota

Në rajon po konsumohet një tjetër krizë politike mes fqinjësh. Kësaj radhe mes Malit të Zi dhe Kroacisë. Miratimi nga paralenti malazez i një rezolute mbi viktimat e Jasenovacit, ka provokuar reagime nga Zagrebi zyrtar.

Kryeministri i Kosovës, Albin Kurti, ka publikuar një opinion në gazetën “The Neë York Times” përmes së cilës shpreh vlerësimet e veta për NATO-n dhe rolin e saj në krijimin e shtetit të Kosovës.

Kurti vë në dukje se në prag të samitit të së martës, që përkon me 75 vjetorin e Aleancës perëndimore, Kosova duhet parë si një shembull suksesi jo vetëm për pavarësinë, por edhe për demokracinë.

Zgjedhjet iraniane kanë nxjerrë fitues të garës presidenciale, Masoud Pezeshkian, i cilësuar në perëndim si reformist. Ai fitoi 16 384 403 vota dhe mundi ultrakonservatorin Saeed Jalili që mori 13 538 179 vota në një pjesëmarrje prej 49.8%.

Fitorja cilësohet si një mundësi e re modernizimi dhe hapjeje për Iranin. Pezeshkian ka shprehur hapur qëndrimin për çështje të tilla si heqja e detyrimit për femrat që të veshin hixhabin, heqja e kufizimeve të përdorimit të internetit. Masa që krijojnë një frymëmarrje, por edhe në fakt I përgjigje mesa duket kërkesave të vetë shoqërisë.

Kryeministri hungarez Viktor Orban ka mbajtur fjalën dhe sapo ka marrë presidencën e Bashkimit Europian, ka vizituar Moskën. Agjencia “Tass” cilëson se ai është i pari lider perëndimor që viziton kryeqytetin rus që nga prilli 2022, pra dy muaj pas nisjes së konfliktit në Ukrainë. Nëse qëndrimet e palës ruse janë të njohura, Orban nga ana e vet ka shpalosur mendimet e veta për krizën e tanishme, duke marrë një pozicion që e vendos Perëndimin në një situatë jo shumë të mirë.

Rusia nuk e sheh si ndërmjetës të mundshëm presidentin turk, Erdogan.

Ky i fundit, gjatë një takimi që ka pasur me homologun rus në kuadër të samitit të Organizatës së Bashkëpunimit të Shangait (SCO) në Kazakistan, është shprehur se Ankaraja mund të ndihmojë në përfundimin e luftës Ukrainë-Rusi.

Por zëdhënësi i Putinit, Dmitry Peskov, përjashtoi çdo rol si ndërmjetës për liderin turk.

Europa kthen djathtas, Britania e Madhe majtas. Zgjedhjet në Mbretërinë e Bashkuar flasin për një fitore dërrmuese të laburistëve, 14 vjet pas daljes së tyre nga pushteti. 170 vende në Dhomën e Ulët të Parlamentit për të majtët e Keir Starmer, shumica më e madhe e tyre që nga koha e Tony Blair. Rishi Sunak pritet të japë dorëheqjen dhe të dhënat po flasin për 131 vende në Parlament, një rekord i ri për përfaqësimin më të ulët që nga viti 1906 me 156 vende për konservatorët.

Ka për të qenë një natë pabesueshmërisht e vështirë

Europa po hyn në një test të ri politik që ilustron qartë krizën e thellë të besimit në funksionimin e sistemit të saj. Mediat raportojnë se në zgjedhjet e ditës së djelë në Francë do të dislokohen 30 mijë policë për shkak të frikës për dhunë.

Sipas ministrit të Brendshëm, Gerald Darmanin, 5000 policë do të dislokohen në Paris “për të siguruar që e majta dhe e djathta radikale nuk do të përfitojnë për të krijuar kaos”.

Në Gjermani, kisha katolike po braktiset me ritme të shpejta. Rreth 400 mijë katolikë janë larguar prej saj gjatë vitit 2023, sipas CNA Deutsch, partneri i lajmeve në gjuhën gjermane të CNA.

Kjo ka vënë në alarm Vatikanin, i cili vetëm një ditë pas publikimit të këtij lajmi, thirri përfaqësuesit e Rrugës Sinodale Gjermane për të diskutuar mbi planet për një këshill të përhershëm sinodal.

Presidenti serb, Aleksander Vuçiç, deklaron se vendi i tij është mbikëqyrur nga ajri nga vendet fqinj. Mediat serbe raportojnë për një deklarim të tij në Kolegjiumin e Shtabit të Përgjithshëm të ushtrisë, përmes të cilit ai ka vënë gishtin mbi Kosovën dhe dronët e saj, “Bayraktar”.  Vuçic është shprehur se dronët janë ngritur nga Gjakova në datat 5 qershor dhe 20 qershor në lartësinë 5800 m dhe kanë vëzhguar pozicionet e ushtrisë serbe.

Ambasadori rus në Britaninë e Madhe, Andrey Kelin, ka deklaruar se operacioni special në Ukrainë është në një fazë dinamike dhe së shpejti ai do të kalojë në suazën e një ofensive strategjike. Ai ka bërë paralajmërimin në një intervistë për Sky, ku është pyetur ndër të tjera për premtimet e Donald Trump se do të mbyllte luftën në Ukrainë në 24 orë. Kelin nuk e ka përjashtuar kategorikisht opsionin e paqes imediate në Ukrainë si dëshirë dhe opsion propagandistik të kandidatit për president të SHBA, por ka shtuar se kjo është e vështirë.