Vuçiç deklaron se Serbia survejohet nga dronët e Kosovës dhe flet për "një agresion ndaj vendit të tij"

Presidenti serb, Aleksander Vuçiç, deklaron se vendi i tij është mbikëqyrur nga ajri nga vendet fqinj. Mediat serbe raportojnë për një deklarim të tij në Kolegjiumin e Shtabit të Përgjithshëm të ushtrisë, përmes të cilit ai ka vënë gishtin mbi Kosovën dhe dronët e saj, “Bayraktar”.  Vuçic është shprehur se dronët janë ngritur nga Gjakova në datat 5 qershor dhe 20 qershor në lartësinë 5800 m dhe kanë vëzhguar pozicionet e ushtrisë serbe.

Kemi shumë sfida, forca të shumta janë mbledhur në rajon, për arsye të ndryshme. Ne duhet të përpiqemi më shumë dhe më mirë, të rrisim numrin e trupave në ushtrinë tonë dhe të jemi shumë më të qartë në mesazhin tonë të frenimit të ndonjë agresioni të mundshëm drejt vendit tonë

citohet Vuçiç.

Mesazhet e tij vijnë ndërkohë që Beogradi ka iniciuar të ashtuquajturin Kuvend Gjithëserb për të Ardhmen e Popullit Serb, duke përfshirë në veprime të koordinuara hapur edhe Republikën Srpska, që pak javë më parë u kërcënua hapur nga Perëndimi se do të pushonte së ekzistuari nëse ndërmerrte veprime për ndryshimin e Kushtetutës.