Lajme

Afganistani mund të qeveriset nga një Këshill ndërkohë që në krye të tij mund të jetë lideri taleban, Haibatullah Akhundzada. Të paktën këtë raporton agjencia “Reuters” që referon një zyrtar të grupit që mori pushtetin në Afganistan. Sipas të njëjtit burim thuhet se talebanët po përpiqen të krijojnë një forcë ushtarake ku do të pranohen edhe ushtarët aktualë afganë nëse do të kenë dëshirë.

Ambasadori amerikan në Kosovë, Philip Kosnett ka vlerësuar publikisht qeverinë e Kosovës për vendimin e saj për pranimin e afganëve që ikin nga talebanët.

Në emër të Shteteve të Bashkuara, falënderimet e mia më të thella për Qeverinë dhe popullin e Kosovës për gatishmërinë tuaj për t'u ofruar strehë partnerëve tanë afganë në udhëtimin e tyre drejt një jete të re. Edhe një herë, Kosova demonstron lidership në skenën globale

Këngëtari dhe kompozitori legjendar, si edhe fitues i Nobelit të Letërsisë në vitin 2017, Bob Dylan, është nën akuzë për përdhunimin e një minoreneje. Dylan është paditur në gjykatë për abuzim me të mitur, një ngjarje që supozohet se ka ndodhur disa dekada më parë. Sipas akuzës, ai ka droguar një dymbëdhjetë vjeçare dhe ka abuzuar me të disa herë, edhe në apartamentin e tij në Hotel Chelsea, në vitin 1965. Lajmin e bëjnë të ditur mediat amerikane.

Ish-zv.komandanti i Forcës Detare, Artur Meçollari, ka deklaruar në MCN Tv se dhënia me konçesion e sipërfaqeve të bazave detare që janë të klasifikuara si pronë për përdorim ushtarak, është tashmë pjesë e hetimeve të SPAK.

Meçollari ka deklaruar se ai ka paditur ministren e Mbrojtjes, Olta Xhaçka, por edhe të tjerë përfaqësues të Ministrisë, për shkelje të ligjit.

Pajet e evakuuimit nga Kabuli kanë sjellë në vëmendje historinë e largimit të SHBA nga Saigoni në vitin 1975.

Dallimi i vetëm është se administrata e tanishme amerikane po mbrohet duke thënë se ky nuk është Viatnami. Në një farë mënyre po. SHBA i tërhoqi trupat dhe ishte qeveria afgane që formalisht ra. Mirëpo 20 vjet angazhim ushtarak dhe 2 trilionë dolllarë bashkë me mijëra të vdekur, ku shkuan?

Pamjet dhe videot e shpërndara sot dokumentuan fundin e një përballjeje 20 vjeçare. Talebaët morën Kabulin, ngritën flamurin e tyre dhe hynë në pallatin presidencial prej nga ky, presidenti Ghani kishte ikur drejt Taxhikistanit. Episodi pati edhe një aspekt disi komik: ministri i Brendshëm në detyrë i Afganistanit, Abdul Sattar Miszakwal deklaronte sot se:

Afganistani do të ketë një transferim paqësor të pushtetit drejt një qeverie tranzitore të drejtuar nga Talibani

Turqia ka njoftuar sot se muri 295 km i gjatë në kufirin me Iranin është drejt përfundimit. Ministri turk i Mbrojtjes, Hulusi Akar ka vizituar kufirin dhe që andej ka bërë të ditur se pjesa më e madhe ka përfunduar dhe se janë gërmuar 150 km llogore. Ai ka shtuar se në administrimin e murit dhe për realizimin e veprimeve mbikëqyrëse do të instalohen pajisje termike për shikim natën, 1000 mjete lokalizuese.

Ne do të intensifikojmë punën tonë, do të përforcojmë kuptimin e parimit se “kufijtë tanë janë të pakalueshëm”

Qeveria e Kosovës, presidentja e saj, Vjosa Osmani, kanë bërë të qartë se kanë pranuar kërkesën e Shteteve të Bashkuara të Amerikës për strehimin e afganëve që po ikin nga regjimi i talebanëve që sot hyri në Kabul. Pa asjë mëdyshje, bota politike shqiptare është rreshtuar në krah të SHBA në këtë moment dëshpërues kur sheh sesi fuqia kryesore në botë që i bën moral mbarë botës, detyrohet të kërkojë një konvikt për njerëzit e vet. Ashtu qoftë!

7 tetor 2001. Presidenti amerikan George Bush njoftonte se kishte urdhëruar nisjen e veprimeve ushtarake kundër regjimit të talebanëve në Afganistan. Bush deklaronte se ndërhyrja kishte për qëllim eliminimin e objektivave ushtarakë dhe neutralizimmin e Afganistanit si një bazë terroriste. Ish-presidenti njoftonte se në veprim ishin 40 vende dhe se aksioni ushtarak:

mbështetej nga vullneti kolektiv i botës

Ish- kreu i Administratës amerikane për Ushqimin dhe Barnat, Scott Gottlieb ka deklaruar se CoVid-19 është duke u shndërruar në një sëmundje endemike pas kalimit të fazës kulmore të epidemisë së variantit Delta të Sars-Cov-2.

Ne po kalojmë nga një pandemi në një virus që është më tepër endemik, të paktën këtu në SHBA dhe me gjasë në tregjet perëndimore. Do të vazhdojë të jetë pandemi në shumë pjesë të botës ku nuk kemi shkallë të lartë vaksinimi