Intervista e Arvizu-së, Shekulli e Panorama

Intervista e ambasadorit Arvizu në Top Story ishte e mbushur me qëndrime, dhe gazetarët e kanë pasur me siguri të vështirë të zgjedhin ndonjë qëndrim për ta nënvizuar në mënyrë të veçantë. Por është interesante të vihen re politikat editoriale të dy të përditshmeve tona më të shitura, gjë që mund të bëhet duke shqyrtuar titujt që ato kanë zgjedhur për ta dhënë këtë informacion (ne të respublica-s e bëjmë shpesh këtë vëzhgim). Shekulli s’i kish dhënë rëndësi fare kësaj interviste (ndoshta për shkak të marrëdhënieve të vështira të njëherë e një kohe? Apo ndoshta nga që s’kanë parë asgjë veçantërisht interesante në këtë lajm?); nuk e kishin njoftuar në faqe të parë; lajmin e jepnin megjithatë në faqen 6 me titull “Arvizu: FBI solli ekspertizën, Berisha kërkon organizatorët”.

Ndërsa Panorama i kish rezervuar lajmit një kuadrat të vogël në faqe të parë, ku kish ngucur foton e vogël të Arvizu-së dhe titullin “Arvizu: vrasjet e 21 janarit po shfrytëzohen paturpësisht politikisht”. Në faqet 4-5 kishin zgjedhur dhe një nëntitull: “SHBA-të nuk e urdhëruan Gardën të qëllonte, e nuk paguajtën as njerëz nga Laçi e Lezha të sillnin shqetësim”.

Zgjedhje e çuditshme në të dy rastet.

Re.Pu.