Rama nga Brukseli: Kriza po na troket në derë; ka për të qenë stuhi.

Rama është takuar me të vetët në Bruksel, me socialdemokratët, dhe me ta ka folur dhe për impaktin e krizës në Shqipëri, gjë që u kuptua nga çfarë ai vetë tha pas takimit me kreun e grupimit të majtë në Parlamentin Europian, Martin Schulz. Ka kohë që nga kampi i opozitës po dalin zëra kasandrash, të cilët më shumë se sa ndjellin keq, janë duke tentuar të paralajmërojnë të keqen. Por Rama këtë herë ka një vizion katastrofik.

“Ne jemi të bindur, se Shqipëria është përpara një stuhie financiare, për të cilën qeveria jo vetëm nuk ka bërë asgjë për ta shmangur, por duke e fshehur krizën e ka bërë stuhinë edhe më të pashmangshme. Jemi ende në kohë për të ulur efektet e saj, por në rast se kokëfortësisht qeveria do të vazhdojë ta mohojë krizën, stuhia do të jetë shumë më e rëndë”, thotë ai. Dhe më poshtë bën një nga ato lodrat e fjalëve, të cilat kur është në Tiranë i shkruan në twitter: “Dhe fatkeqësisht do ta paguajnë ata që kanë më pak dhe të cilëve iu kërkohet të paguajnë më shumë, se sa ata që kanë më shumë dhe paguajne me pak [taksa]”.

Re.Pu.