Ndryshim i sistemit zgjedhor? AK: Mos u gënjeni nga autografët!

Pasi kryetarët e dy partive të mëdha, PS dhe PD, firmosën deklaratën e 26 partive për ndryshimin e sistemit zgjedhor, Paskal Milo, njëri nga bashkëhartuesit e saj, e quajti një sukses të madh faktin që kaq shumë parti shqiptare, duke përfshirë edhe dy të mëdhatë ranë dakord për të bërë një ndryshim kaq të rëndësishëm të rregullave të lojës demokratike. Por një fjali me dy kuptime e Berishës në një intervistë te Zëri i Amerikës (ai tha se formula e zbatimit të sistemit rajonal zgjedhor është dicka që duhet diskutuar nga matematicienët) e lëkundi pak entuziazmin e Milos. Ai dje i bëri thirrje Berishës që t'i përmbahet firmës që ka vënë.

Ndërsa Aleanca Kuqezi, në një deklaratë të sotme e ironizoi entuziazmin e partive të vogla rreth sinqeritetit të partive të mëdha për ndryshimin e sistemit duke u sugjeruar të mos gënjehen nga "autografët" e hedhur në deklaratën e 26 partive. Sipas AK-së, “Berisha nuk do të lejojë kurrë që sistemi aktual të ndryshojë, pasi duke mos i pasur votat e shqiptarëve për të qëndruar në pushtet, ky sistem është shpresa e tij e fundit për të mbajtur pushtetin”.  

Në këtë faqe (http://www.respublica.al/opinion/2012/1/9/perse-berisha-nuk-e-do-korigjimin-kombetar-te-sistemit-zgjedhor-rajonal), ne kemi argumentuar se i sigurtë Berisha nuk mund të jetë me sistemin aktual, por i avantazhuar do të jetë me të.

E.Zaloshnja