K. Krisafi: Kush ka negocjuar marrëveshjen e detit me Greqinë ka shpërdoruar detyrën

Akademia Shqiptare e Arteve dhe e Shkencave ka organizuar të parën veprimtari publike, dhe si të kenë dashur të përcjellin një mesazh për shumëkënd, kanë patur në fokus Marrëveshjen e zhurmshme detare mes Shqipërisë e Greqisë. Ksenofon Krisafi, anëtar i kësaj Akademie, përshkruajti fillimisht atë që ka ndodhur sipas një leximi të vetit. Ishte një përshkrim denoncues: “Të dhënat që dolën nga kabllogramet dhe nga informacionet e tjera të publikuara pas nënshkrimit të marrëveshjes vërtetuan zyrtarisht se marrëveshja shqiptaro-greke iu imponua me presion Tiranës, u pranua në mënyrë të pashpjegueshme nga udhëheqja shqiptare  dhe u tolerua me servilizëm dhe inkompetencë profesionale nga grupi negociator shqiptar.”

Ç’duhet bërë tani që Gjykata jonë Kushtetuese e ka shfuqizuar këtë marrëveshje? Studjuesi Krisafi e ka një ide në emër të Akademisë: “Duhet patur parasysh që marrëveshja e nënshkruar në prillin e vitit 2009 nuk ekziston më, është një gjë që nuk ka asnjë vlerë juridike dhe negociatat nuk mund të fillojnë mbi bazën e kësaj marrëveshjeje me mendimin që mund të bëhen disa arnime. Jo. Negociatat duhet të fillojnë me një dokument të ri të hartuar nga e para. Negociatat duhet të fillojnë me një ekip tjetër negociator sepse rezultoi që anëtarët e përbërjes së mëparshme, treguan paaftësi, inkompetencë profesionale, madje sipas mendimit tim, shpërdoruan detyrën zyrtare”.

Re.Pu.