Lavrov: Ka ca pyetje të cilave Gjermania nuk u ka dhënë përgjigje  

Sulmi ndaj gazsjellësit Nord Stream ka sipas Rusisë më shumë sesa dorën e Ukrainës. Ndërsa Gjermania ka shpallur në kërkim një ukrainas si autorin e dyshuar të shpërthimit nënujor të tubacionit, Kremlini mendon se kaq nuk mjafton. Në një koment për të përditshmen Izvestia, ministri i Jashtëm rus, Sergei Lavrov, flet për një komplot shumë më të madh.

"[Gjermania] duhet t'u përgjigjet të gjitha pyetjeve. Së pari, ata duhet të ndalojnë së refuzuari kategorikisht për të paraqitur faktet që nuk mund të mos i zbulonin. Kur të paktën një pjesë e informacionit që ne kërkojmë nuk jepet përmes kanaleve zyrtare, por shfaqet në artikujt e gazetave, dhe njëkohësisht në tre periodikë gjermanë dhe në Wall Street Journal në Shtetet e Bashkuara të Amerikës, kjo ngjall mendimin se e gjitha ishte komplotuar paraprakisht”, tha Lavrov.

Kreu i diplomacisë ruse thotë se ukrainasit nuk do të kishin mundur ta kryenin sulmin kundër Nord Stream pa mbështetjen e SHBA.

"Tani jemi dëshmitarë të përpjekjeve për të fajësuar për gjithçka një grup oficerësh të dehur, të cilët së bashku me biznesmenët që po festonin me ta, ose punësuan dikë ose vendosën ta mësojnë vetë zhytjen. Kjo nuk është serioze," tha Lavrov.

"Edhe nëse ndonjë nga personat e përmendur në shtypin gjerman, ukrainas, ishte disi i përfshirë në këtë, është e qartë se ata nuk mund ta kishin bërë këtë vetëm. Është e qartë se një sulm i tillë terrorist kërkonte urdhra nga lart, nga vetë kreu, siç themi ne, dhe maja për Perëndimin është Uashingtoni, natyrisht”, shtoi ministri i Jashtëm rus.

Lavrov është i sigurt se "i gjithë ky operacion u konceptua për të larguar disi vëmendjen e publikut si në Gjermani ashtu edhe në mbarë botën nga autorët e vërtetë, fajtorët dhe përfituesit përfundimtarë të këtij akti terrorist".

"Ne do të insistojmë në një hetim ndërkombëtar transparent," vazhdoi ai.

Është një turp për Gjermaninë të pranojë në heshtje mënyrën se si iu privua baza afatgjatë e furnizimit me energji dhe, rrjedhimisht, nga prosperiteti ekonomik, i cili në përgjithësi ishte çelësi i zhvillimit të saj për shumë dekada në formën e furnizimeve të qëndrueshme të gazit rus me çmime të arsyeshme. Gjermania e gëlltiti [këtë] në heshtje, pa asnjë koment”.