Zaev

Taktika elektorale e opozitës maqedonase për t’u kërkuar mbështetësve të bojkotojnë referendumin u dha një fitore disi morale kundërshtarëve të Zaevit, por duket se nuk e frenon hyrjen në fuqi të marrëveshjes me Greqinë për ndryshimin e emrit të Ish-Republikës Jugosllave të Maqedonisë.

Qeveria shqiptare përfshihet në fushatën për referendumin e emrit në Maqedoni.  Ka qenë ministri i Jashtëm, Ditmir Bushati që i kërkoi hapur popullsisë shqiptare të votojë pro marrëveshjes me Greqinë për emrin.

Maqedonia mbetet pika më delikate në Ballkanin Perëndimor dhe një vend ku përplasen disa interesa. Provë për këtë është fakti se kancelarja gjermane Angela Merkel do të vizitojë Shkupin më 8 shtator, vetëm tre javë përpara referendumit për Marrëveshjen e Prespës që çoi në zgjidhjen e konfliktit me Greqinë për emrin.

Referendumi mbi ndryshimin e emrit të Maqedonisë do të mbahet më 30 shtator, siç njoftoi të hënën kryeministri Zoran Zaev.

Sipas asaj që transmeton agjencia shtetërore e lajmeve MIA, pyetja të cilës do të kërkohet t'i përgjigjen maqedonasit pozitivisht ose negativisht është nëse jeni në favor të bashkimit të vendit me NATO-n dhe Bashkimin Evropian, duke mbështetur Marrëveshjen e Prespës të nënshkruar muajin e kaluar.

Përpjekje të Rusisë për të sabotuar referendumin për emrin në Maqedoni ka denoncuar kryeministri Zoran Zaev, duke folur për përfshirje të biznesmenëve të fuqishëm grekë në nxitje trazirash, por pa përmendur emra.

Zaev tha në një intervistë për Buzzfeed se qeveria e tij ka marrë shumë ankesa se "biznesmenët grekë me lidhje të ngushta me  Rusinë  kanë paguar nga 13 000 deri në 21000 dollarë për të nxitur "incidentet të dhunshme "para referendumit.

Zoran Zaev ka provokuar nervat e presidentit Ivanov në një intervistë për  kanalin grek ERT, kur tha se presidenti do të mbështesë marrëveshjen për emrin e Maqedonisë, nëse referendumi do të jetë i suksesshëm dhe populli do t’i thotë po paktit me Greqinë.

Zyra e tij reagoi duke sqaruar se Ivanov nuk ka ndryshuar qëndrim lidhur me çështjen e emrit dhe se asnjë formë  presioni, shantazhi apo kërcënime hnuk do ta bëjë  të nderroje  mendim.

Dy qeveritë e Greqisë dhe të Maqedonisë kanë nënshkruar sot përmes kryeministrave, Alexis Tsipras dhe Zoran Zaev marrëveshjen dyplaëshe që i jep fund debatit shumëvjeçar për emrin. Marrëveshja është firmosur në fshatin Psarades pranë liqeit të Prespës së Madhe dhe në ceremoni kanë qenë të pranishëm edhe zyrtarë të OKB-së dhe të BE-së.

Kjo është një marrëveshje me përfitim të ndërsjellë që respekton plotësisht vlerat dhe parimet e popujve

tha kryeministri grek, Alexis Tsipras. 

Arritja e marrëveshjes për emrin e Maqedonisë sipas revistës Foreign Policy meriton çmimin “Nobel” për Paqen. “Dy liderët që meritojnë Çmimin Nobel për Paqen nuk u takuan këtë javë në Singapor. Ata do të takohen të dielën në kufirin mes Greqisë, Maqedonisë dhe Shqipërisë”-shkruan revista. Më tej thuhet se kryeministrat Alexis Cipras dhe Zoran Zaev do të nënshkruajnë arritjen e marrëveshjes për zgjidhjen e konfliktit afatgjatë mbi emrin e Maqedonisë. Vendi ballkanik sipas marrëveshjes do të njihet me emrin "Republika e Maqedonisë Veriore"

"Maqedonia Veriore" ose "Severna Makedonija" është emri i dakordësuar mes Athinës dhe Shkupit për emrin e ri të Maqedonisë. Këtë e konfirmoi kryeministri grek, Aleksis Tsipras pas bisedës së dytë telefonike që kishte me homologun Zoran Zaev.

Mediat greke shkruajnë se kjo zgjidhje i lejon Greqisë "të përvetësojë" historinë e Maqedonisë së lashtë, e cila përdorej si referencë edhe nga vendi fqinj. Të njëjtat burime theksojnë se "marrëveshja parashikon që Greqia të heqë veton vetëm pasi të përfundojë shqyrtimi i kushtetutshmërisë nga Shkupi.

Pa përmendur detaje, ministri i Jashtëm grek, Nikos Kotzias tha se kryeministri i Maqedonisë, Zoran Zaev, ka zgjedhur variantin përfundimtar të emrit të Maqedonisë.
"Sot morëm hapin vendimtar"- tha shefi i diplomacisë greke duke iu referuar komunikimeve telefonike që Alexis Tsipras dhe Zoran Zaev kishin këtë të hënë.