Ngjarje pa precedent: Ndeshja Genoa-Siena ‘gjykohet’ nga tifozët

Në Gjenovë (Genoa) të Italisë ka ndodhur diçka që ka lënë gojëhapur gjithë opinionin futbollistik të fqinjit tonë të përtej Aadriatikut. Sot luhej ndeshja Genoa-Siena, e cila kish rëndësi për të dyja skuadrat që po luftojnë për t’i shpëtuar rënies nga kategoria më e lartë (e famshmja ‘Serie A’). Por nuk ishte dita e vendasve. Siena shënoi golin e parë, shënoi të dytin, pastaj të tretin, e në fund të katërtin, dhe kur ndeshja ish 0-4, një grup tifozësh fanatikë (në Itali i quajnë Ultrás), zunë të hidhnin shashka e të grumbulloheshin mbi pikën ku lojtarët do duhej të hynin në dhomat e zhveshjes. Arbitri pezulloi lojën për shkak të bombave që bënin tym e zhurmë në minutën e tetë të pjesës së dytë, dhe prej atij momenti, për 40 minuta të tëra, ndodhi një ngjarje surreale. Në mungesë të policëve (gjithë-gjithë ishin një duzinë, ngaqë askush s’kish menduar një skenar të tillë), situatën e morën në dorë tifozët, të cilët bllokuan gjithçka pa zbritur në fushë, derisa erdhi puna që lojtarët e Genoa-s u shtrënguan prej tifozëve kërcënues të hiqnin bluzën (si të padenjë për ta mbajtur veshur). Lojtarët iu bindën ‘urdhërit’, dhe në fund u deshën këmbëngulja e futbollistit Sculli, të  vetmit që s’pranoi ta hiqte bluzën, dhe negociatat e ndezura mes tij e tifozëve që i bëri këta të fundit të tërhiqeshin. Në fushë u rifutën lojtarwt e Siena-s e gjyqtarët, dhe loja vijoi. Lojë i thënçin. Lojtarët vinin vërdallë si somnambulë.

Re.Pu.