Debati presidencial në Francë: Sarkozy nervoz dhe Hollande në sulm

Secili u paraqit me gruan e vet në studion televizive, ku do zhvillohej debati. Ora 21.00 fiks, dhe debati filloi. Të ulur përballë sho-shoqit. Në të djathtë Nicholas Sarkozy e në të majtë François Hollande. Radhën për të folur i pari e pati, për shkak të shortit, i dyti. Programi i drejtuar nga dy gazetarë, e që zgjati dy orë e gjysmë, u transmetua nga televizioni publik France 2 e nga ai privat Tf1. “Ju jeni një figurë esenciale e Francës, por nëse mendoni se nuk e keni përçarë këtë vend, jeni gjithë ditën gabim”, i tha Hollande mes të tjerash. I erdhi përgjigja shpejt: “Të bësh bashkimin e njerëzve (termi i përdorur në frëngjisht deri në mërzi ishte rassemblement) është retorikë e bukur, por puna është se duhen fakte. Unë u flas njerëzve jo si njeri i një partie. Unë kam bërë reforma.”

Kanë zënë të flasin për pothuaj një orë të tërë lidhur me papunësinë, me taksat, me biznesin, me borxhin publik, dhe në një moment Sarkozy i thotë: Ju jeni gënjeshtar. Përgjigja e Hollande-it ishte: “Metodologjia juaj është mungesa e respektit. Kjo fyerje që më bëni do duhej të ish e padurueshme për mua, por shkon shumë në gojën tuaj”.

Më poshtë mollë sherri është bërë Silvio Berlusconi. Hollande ka lënë të kuptohet një miqësi midis Sarkozy-së e ish-kryeministrit italian. Por Sarkozy-ja mohon prerë, si të ish fjala për një lebroz: “Berlusconi nuk është miku im. Berlusconi është mik i Berlusconi-t. Ju jeni lutur për fitoren e tij në zgjedhje.”

E.G.