Propozimi i PS-së për sistemin zgjedhor: 10 zona të barabarta

Shekulli i sotëm citonte Damian Gjiknurin, bashkëkryetarin socialist të grupit të punës për reformën zgjedhore, të ketë thënë se, nëse PD-ja nuk do të pranojë korrektim kombëtar të sistemit zgjedhor aktual, opozita do të propozojë një ndarje të re të zonave të administrimit zgjedhor. “Për ta bërë më proporcional sistemin duhet bërë riformatimi i zonave zgjedhore, që në Shqipëri të ketë zona zgjedhore fikse, përshembull mund të ishin 10 zona apo 6. 10 zona do të ishin më të pranueshme, të ndara me 14 deputetë secila,” ka deklaruar Gjiknuri.

Aktualisht, zonat zgjedhore janë ndarë sipas qarqeve. Kjo gjë krijon pabarazi të konvertimit të përkrahjes elektorale në mandate parlamentare, sepse në një qark të madh si Tirana, me 3% të votave sigurohet një mandat. Ndërsa në një qark të vogël si Kukësi një mandat kërkon një përkrahje elektorale prej rreth 25%.  Në qoftë se propozimi i PS-së për 10 zonat zgjedhore me nga 14 deputetë secila pranohet, në çdo zonë do të duhet po e njëjta përqindje votash për një mandat – 7.1%. Po të ishtë zbatuar kjo ndarje zonash në vitin 2009, shpërndarja e mandateve do të kishte qenë: Koalicioni Berisha 68, Koalicioni Rama 68, dhe Koalicioni Meta 4 mandate.

E.Zaloshnja