Tahiri: Marrëveshja me Berishën nuk është vendosur në mbledhje të kryesisë së PDIU-së

Deputeti i PDIU-së, Dashamir Tahiri, reagoi në të nxehtë kundër marrëveshjes së konkretizuar mes kësaj partie e kryeministrit Berisha, në bazë të së cilës çamëve u jepen disa poste në nivel zv.ministrash. Në fakt, refuzimi i kësaj marrëveshjeje nga ana e tij ngrihej mbi motive më shumë pragmatiste, e më pak parimore. Ai në thelb linte të kuptohej se Berishës mund t’i merrej më shumë pushtet në këmbim të votave të tyre në parlament, dhe se personat e caktuar si zv.ministra do duhej të ishin nga qytetet me peshë elektorale në favor të çamëve (Sarandë, Fier, Vlorë). Ngrinte dhe një problem që kish të bënte me miratimin e kësaj marrëveshjeje në rrugë extra partiake.

Një ditë më pas, Idrizi mori mbështetjen publike të Tahir Muhedinit, i cili garantonte se çdo vendim ish marrë në rrugë statutore. Është e vërtetë? Sipas Dashamir Tahirit, jo. Ky i fundit ka reaguar sot dhe don të dijë se pse ai vetë nuk ka marrë pjesë në atë “mbledhje kryesie [ku është marrë] një vendim unanim”, dhe fton Idrizin e Muhedinin ta publikojnë procesverbalin e mbledhjes së bërë. Më tej, ai kërkon nga të tjerët të bëhen të gjallë në këtë situatë: “Ftoj të gjithë anëtarët e tjerë të PDIU-së të reflektojnë thellë sepse në momente si ky i tanishmi nevojitet të jenë transparentë përballë komunitetit tonë që na njeh dhe e di gjendjen aktuale dhe është shumë e pamoralshme t’u hedhim hi syve”.

Re.Pu.