Rritja ekonomike, a do të na befasojë INSTAT-i?

INSTAT-i publikoi më në fund (me 47 ditë vonesë) treguesit e Prodhimit të Brendshëm Bruto për tremujorin e tretë të vitit 2011. Sipas institutit, rritja për atë tremujor, krahasuar me të njëjtën periudhë të një viti më parë, ishte 2.6 përqind. Kjo shifër vjen e përmirësuar në raport me treguesit e PBB-së për tremujorin e dytë, gjatë të cilit pati një rritje vetëm 0.5 përqind.

Por edhe pse të gjithë treguesit flasin për një ngadalësim të aktivitetit ekonomik të vendit, qeveria këmbëngul për një rritje vjetore prej 3.9 përqind për 2011-ën. Deklarata më e fundit në këtë drejtim është bërë nga ministri i Financave, Ridvan Bode. “Rritjen prej 3,9% e konfirmon dhe INSTAT-i”, - do t’i përgjigjej ai atëherë këmbënguljes së gazetarëve nëse “i kishin bërë mirë llogaritë”.

Nëse përllogarisim treguesit në tre tremujorët e parë të 2011-ës, nuk na del një rritje 3.9 përqind (rritja mesatare për 9 muajt e parë të 2011-ës ishte vetëm 2.3 përqind). Por ka një shpresë që parashikimi i qeverisë të përmbushet. Është tremujori i fundit 2011 ai që mund ta shpëtojë qeverinë: “Me një rritje të paparë në fund 2011”.

Kjo arrihet vetëm nëse INSTAT do të certifikojë një rritje 8 përqind në tremujorin e fundit të 2011!! Mundet? Duhet të presim INSTAT-in që të na befasojë kur të publikojë treguesit e PBB-së së tremujorit të katërt.

S.E.