Një fatkeq më pak

Balkanweb raportonte se një punëtor ndërtimi ka humbur jetën në Elbasan pasi ka rënë nga skela në katin e katërt. Lajmit i ishin kushtuar veç disa rreshta sepse zakonisht nëpër mediat shqiptare lajme të tilla për vdekje apo gjymtime në punë nuk marrin më shumë vëmendje se kaq. Dhe ç’është më e keqja duket sikur edhe publiku nuk e vë fort ujin në zjarr (shteti jo e jo) për të gjithë ata fatkeqë që humbasin jetën apo këmbët e duart gjatë punës, kryesisht për shkak të kushteve skandaloze të sigurisë që nuk përmbushin as kërkesat minimale të ligjit.

Në çdo shtet serioz të botës aksidente të tilla hetohen, nxirren përgjegjësitë, kompanitë ndëshkohen me gjoba apo detyrohen t’u paguajnë dëmshpërblime a pensione familjarëve të viktimës apo vetë të aksidentuarit në rast plagosje. Kjo ndodh madje edhe kur kompania ka respektuar kushtet e sigurisë në punë, se po të zbulohet ndonjë shkelje apo që i aksidentuari ka qenë i punësuar në të zezë, e piu e zeza dhe vetë kompaninë.  Por a keni dëgjuar të hetohet a ndëshkohet ndonjë firmë ndërtimi, minierë apo kompani çfarëdo në Shqipëri për vdekjen apo plagosjen e punonjësve të saj si pasojë e aksidenteve në punë? Jo. Kompanitë shqiptare mund të punësojnë në të zezë, mund të shkelin kushtet e sigurisë në punë si t’ua dojë qejfi, mund të shfrytëzojnë punëtorët në kushte pune që do të kishin qenë të papranueshme edhe për skllevërit e qëmotit, pa pasur asnjë lloj frike se mund të kenë ndonjë problem me ligjin.

Po viktimat? Në pjesën më të madhe të rasteve, viktimat mund ta quajnë veten me fat nëse u kushtohen disa pak radhë në gazetë.  

M.M.