Berisha ha darkë demonstrative me Metën, Garda ‘argëtohet’ me gazetarin e Shekullit

Ndërkohë që Berisha ishte në darkë te shtëpia e një vartësi të tij (Ilir Metës), hera e parë për të në këto njëzet vjet karrierë, Garda e Republikës ka ndaluar me forcë  gazetarin e “Shekulli”-t, Luis Tanushi, pasi tentoi të fotografonte jashtë vilës së Ilir Metës në Bllok çastin kur  kryeministri Sali Berisha po hynte në vilë.

Gazetari i “Shekulli”-t u shoqërua nga Garda pavarësisht se ishte në krye të detyrës dhe nuk kishte cenuar sigurinë e kryeministrit dhe ish-kryeministrit, pasi ndodhej jashtë rrethimit që Garda i ka bërë zonës. Por, Garda e vilave të Republikës ka treguar që nuk e ka problem shkeljen e ligjit e as të cenojë njerëz që gjenden jashtë perimetrit të juridiksionit të saj.

Gazetari Tanushi, njofton Shekulli, u mbajt i ndaluar në një nga makinat e policisë dhe u lirua vetëm pasi iu fshinë fotot në aparat. Berisha ka ndenjur rreth 2 orë në shtëpinë e z. Meta në Bllok, dhe zona perreth është rrethuar nga forca të shumta të Gardës dhe policisë.

Kjo vizitë duket se ka si synim që t'i tregojë Prokurorisë e të tjerëve se në cilin krah qendron Kryeministri në çështjen gjyqësore kundër Metës, çështje për të cilën vendimi merret pas 3 ditësh.

K. Cukali