Llalla: Zyrtarë të lartë me pasuri të luajtshme e të paluajtshme në perëndim

Kreu i ILDKP-së, Adriatik Llalla, ka bërë një deklaratë të beftë dhe të fortë dje. “Shumë zyrtarë të lartë, ministra, zv.ministra e deputetë, arrijnë t’i fshehin pasuritë e tyre në bankat e Europës perëndimore”, tha ai në një tryezë diskutimesh të organizuar nga Komisioni Europian, në kuadër të projektit PAMECA (Police Assistance Mission of the European Community to Albania – Misioni i ndihmës policore i BE-së për Shqipërinë).

Llalla është qarë dje, se nuk ka mjete të mjaftueshme për të ndjekur e verifikuar informacionet që i vinë në vijimësi institucionit të tij mbi zyrtarë të lartë që transferojnë pasuri të luajtshme e të paluajtshme jashtë vendit. Në këto rrethana ai u kërkoi ndërkombëtarëve ta ndihmonin, që të bëhet e mundur shtrirja e hetimit dhe e kontrollit edhe jashtë vendit. Por ambasadori i BE-së, Ettore Sequi, i pranishëm në këtë takim, la të kuptohej se verifikimi i llogarive bankare është një gjë që s’mund të pretendohet. Prandaj, tha pak a shumë Sequi, duhet të prisni më shumë nga institucionet e agjencitë lokale, qeveritare e jo qeveritare.

Në fakt, është hera e parë që kreu i ILDKP-së bën një deklaratë kaq të fortë, duke u bërë kështu interpret i një perceptimi publik mbi korrupsionin në nivelet e larta të administratës.

Re.Pu.