Kryesia e re e PS: Blushi e Malaj ‘in’, Islami e Harasani ‘out’

Kanë mbetur rreth 10 ditë nga 2 dhjetori kur Asambleja e Partisë Socialiste do të zgjedhë kryesinë e partisë dhe më pas edhe Sekretariatin. Ndërkohë që në korridoret e PS-së kanë filluar të artikulohen një radhë emrash, gazeta ‘Shekulli’ “ka zbardhur” sot një listë të mundshme emrash që më 2 dhjetor mund ta shohin veten në garë për një vend në forumet më të larta partiake të socialistëve. Vëmendja, sigurisht përqendrohet më shumë se te prurjet e reja, te largimet e reja që janë shoqëruar në fakt me sinjale të kahershme. Sipas listës së ‘Shekulli-t’ ajo që njihej si LMN është ndarë zyrtarisht e përfundimisht më dysh. Ben Blushi e Arben Malaj priten të jenë dy emra të propozuar për në Kryesinë e re ndryshe nga Kastriot Islami e Andis Harasani që nuk do t’i gëzohen këtij privilegji. Kjo do të jetë njëra nga humbjet e dyshes kritike ndaj kryetarit Rama pasi, nëse i besohet lajmit të ‘Shekulli-t’, Islami e Harasani priten të zëvendësohen edhe nga postet që ata mbajnë si sekretarë të Partisë Socialiste. Andis Harasani mban aktualisht postin e Sekretarit për programin politik, ndërsa Islami të Sekretarit për Çështjet zgjedhore. Në vend të tyre pritet të kandidohen Ilir Beqja dhe Gjiknuri/Subashi.

H.B.