Rama “rrezikon” me gjeste në favor të meritokracisë

Me sa duket, në kuadrin e marrëveshjes së arritur PD-PS, Partia Socialiste ka rënë dakord të marrë postin e Avokatit të Popullit. Duhet të jenë të shumtë ata që kanë pretenduar ta kenë emrin në listën e kandidatëve për këtë post, por Edi Rama, me një lëvizje të beftë e të paprecedent, ua ka prerë shpresat. Ai po guxon të ecë në një shteg tjetër. Po e lë hapur për të gjithë mundësinë për të ushtruar përgjegjësinë e Avokatit të Popullit.

 "Çdo qytetar me shkollim, eksperiencë dhe ambicie për ta marrë përsipër misionin e avokaturës së interesave të popullit është i ftuar të trokasë në derën e Partisë Socialiste për mbështetjen tonë. Ne nuk duam një avokat të Partisë Socialiste që të marrë urdhëra nga partia, por një Avokat të Popullit nën urdhrin e Kushtetutës. Jemi gati të mbështesim shqiptarin apo shqiptaren që e ka këtë ambicie dhe do të rezultojë më adapt për këtë mision publik", tha ai sot në mbledhjen e Grupit të vet Parlamentar.

Është një nga gjestet e rralla meritokratike që janë bërë në këtë vend, por duhet pritur fundi i fabulës për të marrë vesh se sa serioz është në këtë aksion, që mund ta armiqësojë me socialistët e mësuar me idenë që pushtetin e meritojnë ata vetë si “shpërblim për sakrificat e lodhjen që po bëjnë në opozitë”.

M.N.