Mario Monti: Greqia ra për shkak të nepotizmit, evazionit, e trukimit të financave

Kryeministri Italian Mario Monti ish ftuar mbrëmë në një talk show të televizionit La 7 (Piazza Pulita), dhe biseda u fokusua më së shumti te kriza e Eurozonës. Foli dhe për Greqinë: “Deri para ca kohësh, Greqia dukej se po kalonte një periudhë triumfale;dukej sikur ish më mirë se Italia; pastaj, pësoi kolaps”. Pse?, ishte pyetja. “Sepse”, vijoi Monti, “ atje ish instaluar një sistem politik që u shiste iluzione qytetarëve, që lejonte evazionin fiskal të shndërrohej në një praktikë rutinë, që nuk e mbante ekonominë mbi bazën e rregullave e nuk nxiste konkurrencën, që përkrahte nepotizmin e nuk nxiste meritokracinë, e që në fund falsifikonte deri dhe të dhënat e financave publike”. Mund të largohet Greqia nga Eurozona?, ishte pyetja tjetër. “Ndoshta, por pasojat nuk do ishin vetëm për Greqinë, por për të gjithë ne të tjerët, edhe për Gjermaninë”, u shpreh ai. Dhe saktësoi: “Përfytyroni sikur të dalë Italia nga Eurozona. I bie që të kthehemi tek lireta, rrjedhimisht do të kemi të drejtën ta zhvleftësojmë  monedhën tonë. Si do vejë halli i eksporteve gjermane, atëherë?”

M.N.