Shtypi vallëzon me ritëm presidencial

Ka ditë për ditë një fluks opinionesh që kanë në fokus çështjen presidenciale, e cila është bërë përparësi mbi përparësitë, shqetësimi kryesor i gazetave. Në Panorama ish një shkrim i Agim Baçit, i cili, pasi i vë në kandar kandidaturat e Nanos e të Topallit, ‘voton’ për këtë të dytën. Në të përditshmen Shekulli bie në sy një opinion i Yllka Lamçes i njoftuar qysh në faqe të parë. Autorja nuk është e njohur, por teza e saj nuk të lë indiferent: Na duhet një President, jo një hero. Në gazetën Shqip janë publikuar dy opione ‘presidencialë’, njëri i Andrea Stefanit, ku autori rreket të përkufizojë termin ‘president konsensual’, dhe tjetri i Moikom Zeqos me titullin ‘Ekuacioni politik i Presidentit’. Enton Abilekaj, në shkrimin e tij në shqiptarja.com, fut mirë në sitë kandidaturën e Nanos. Titulli thotë diçka lidhur me qëndrimin e tij: Nano kandidon si ambasador.

Në gazetat e tjera vijon e njëjta histori.

Re.Pu.