Berisha dhe Bode shqetësohen për borxhin; lajm i mirë

Tema e Borxhit Publik dhe problematika që mbart ai ka filluar të lëvrohet së tepërmi ditët e fundit, pikërisht nga ata, që deri më tani e kishin anashkaluar, ministri i Financave dhe kryeministri. Borxhi ishte dje kryefjala e fjalimit të Berishës para deputetëve të PD-së në mbledhjen e javës, por edhe pjesa kryesore e intervistës së Ministrit të Financave, Ridvan Bode tek Zëri i Amerikës. Ky i fundit deklaroi se realisht borxhi i vendit është i lartë krahasuar me vendet e rajonit dhe përbën problem, kurse Berisha u përpoq të justifikojë rritjen e tij me arsyetimin e vjetër se PS merrte borxh për të paguar pagat dhe pensionet kurse PD investoi në infrastrukturë.

Fakt është që Bode ka shkuar në Uashington për të marrë një tjetër mbështetje financiare në një kohë kur ritmi i rritjes së të ardhurave në buxhet nuk lejon qeverinë që të jetë e qetë edhe për muajt në vijim. “Shqip” shkruante dje se borxhi që Bode ka shkuar për të marrë në Uashington është rreth 100 milionë dollarë. “Po shikojmë burime të tjera financimi dhe për këtë shkak jam në Uashington, për të biseduar me drejtuesit e Bankës Botërore”, - deklaroi kreu i Financave dje gjatë intervistës tek VOA.

Përkundër vlerësimeve të qeverisë, FMN nga ana tjetër parashikon që Borxhi Publik i Shqipërisë të arrijë në kufijtë e 62 për qind të Prodhimit të Brendshëm Bruto deri në fund të këtij viti. Në disa raste, FMN ka qenë e pasaktë në parashikimet për Shqipërinë, megjithatë duket se shifrat aktuale të borxhit kanë sjellë me këmbë në tokë edhe qeveritarët. Ky po që është lajm i mirë.

S.E