Harasani, një mocion mosbesimi ndaj Berishës

Në një intervistë për ABC News, deputeti socialist Andis Harasani foli për riafrimin e tij me Edi Ramën dhe sugjeroi publikisht se mazhoranca duhet testuar me një mocion mosbesimi ndaj Berishës, përpara se ajo të testohet në votimin për Presidentin e Republikës. Kjo deklaratë e Harasanit për mocion mosbesimi ndaj kryeministrit është e para që artikulohet drejtpërdrejt nga një socialist, pas votimit traumatik në Kuvend për anëtarin e KLD-së. Ajo duket se është në sintoni me thirrjen që Edi Rama bëri në blogun e tij për një bashkim  “të gjithë atyre ende BRENDA SHUMICËS SË SOTME,  që nuk duan të mbeten nesër në duart hakmarrëse e mbytëse të Sali Berishës, ashtu edhe të  të gjithë atyre jashtë shumicës së sotme nëpër tribuna partish e mediash, në rrugët e shoqërisë civile a të sipërmarrjes private, të cilët nuk duan të përfundojnë pas një viti në honin e një makthi fashist pa zgjedhje, pa gjykata, pa media të pavarura, pa biznes të pakapur nga pushteti”

Votimi për mocionin e mosbesimit ndaj kryeministrit, ndryshe nga votimi për anëtarin e KLD-së, bëhet i hapur. Pra, nuk mund të manipulohet, në qoftë se 71 deputetë janë të vendosur të votojnë për një kryeminstër tjetër. (Neni 105 i Kushtetutës thotë: Kuvendi mund të votojë një mocion mosbesimi ndaj Kryeministrit vetëm duke zgjedhur me votat e më shumë se gjysmës së të gjithë anëtarëve të tij një Kryeministër të ri”). E përkthyer në realitetin parlamentar shqiptar, kjo do të thotë se Harasani, me deklaratën e tij, ashtu siç bëri Rama në blogun e vet, po i bën thirrje Metës, Oketës dhe Idrizit që të bashkojnë votat me opozitën për rrëzimin e Berishës në parlament.

E.Zaloshnja