Reforma zgjedhore, të vegjlit e PS-së ndjehen të përjashtuar

Aleatët e majtë janë ndjerë të përjashtuar nga negociatat për sistemin zgjedhor duke reaguar njëzëri sot kundër PS-së. Skëndër Gjinushi, Paskal Milo, Nard Ndoka, dhe Petro Koçi dolën paraditë në një konferencë të përbashkët për shtyp, në të cilën akuzuan kreun e PS-së për prishje të marrëdhënieve zgjedhore dhe se në këtë mënyrë do të bënte që të realizohej skenari i vitit 2009, ku koalicioni i majtë humbi.

Krerët e partive satelite të PS-së, deklaruan ndër të tjera se fitorja e kësaj partie në 2013-ën është e dyshimte për aq kohë sa “Rama nuk mëson nga gabimet e së shkuarës”.

Nuk zgjati as një orë nga deklarata e përbashkët, kur Rama reagoi në rrjetin sociale, Twitter duke dashur të thotë se reagimi i tyre ishte i nxituar, ndërsa theksoi se PS nuk mund t’a përmirësojë sistemin e vetme. “Keqardhje për reagimin në tym të aleatëve ndaj PSs-së! PS mbron të njëjtën bindje me ta, por s’ka në dorë ta përmirësojë pa konsensus sistemin”

Në këtë mënyrë Rama thotë se në tavolinën e negociatave është edhe PD-ja, megjithatë duket që PS-së i intereson sistemi aktual dhe jo proporcionali kombëtar që kërkojnë të vegjlit. Kjo do të jetë edhe molla e sherrit deri në përfundimin e reformës. Deri më tani, aleatët e PS-së kanë qenë më zhurmëmëdhenjtë në këtë drejtim, kurse djathtas, përveç Mediut nuk ka filluar të pipëtijë njëri ende.

S.E.