Topi Pollos: Nuk kam lidhje me logjikën e tenderave teknologjikë

Genc Pollo, ministri ynë i Inovacionit (kjo është ministria më e çuditshme në një vend ku të vetmet inovacione verifikohen në lëmin e abuzimit me pushtetin), hodhi dje një akuzë kolosale mbi Presidentin e Republikës. Ky i fundit, sipas Pollos, “ka përcaktuar për herë të parë hartën e çmimeve për postet e gjyqësorit, d.m.th. të ryshfetit përkatës për çdo emërim në këto poste”. Dhe si provë sjell ca biseda “me gjyqtarë, të njohur të vet, të cilët janë njerëz me profesionalizëm e integritet”. 

Për befasinë e shumëkujt, kjo akuzë kaloi pa u vënë re. Të përditshmet e sotme e kishin injoruar fare këtë lajm ‘bombë’. Por Presidenti i republikës e kish vënë re që ç’ke me të. Dhe ka reaguar me gojën e zëdhënëses (sipas Panoramës). Reagimi është ai që pritej, dmth një tog frazash të llojit ‘akuza të motivuara nga qëllime politike të ditës’, ‘akuza të padenja, që Presidenti i hedh poshtë me neveri’, etj. Në fund, kërkonte nga Pollo ta përcjellë në prokurori këtë pretendim; në mos, të japë dorëheqjen si ministër (nuk kuptohet se pse Presidenti nuk ngre një padi në ngarkim të këtij funksionari të Republikës).

Por në deklaratën presidenciale kish dhe një pickim të fortë për Pollon. “Presidenti nuk ka asnjë lidhje me logjikën e tenderave teknologjikë”, thuhej aty, dhe merret vesh se prapa tenderave teknologjikë nuk mund të fshihet tjetër kush, veçse ministri i Inovacionit dhe i Teknologjisë, Genc Pollo. Këtë e thotë Presidenti.

Re.Pu.