Militantizmi pushton jo vetëm zyrat e shtetit, por dhe muret e zyrave

Në shënimin e djeshëm  të respublica-s me titull “Shpërthimi militant i Florion Mimës” veçonim një thënie pikante nga një intervistë e tij? “Ne ndjejmë egzaltim kur bëhet fjalë për kryetarin e partisë sonë, Sali Berishën”, thosh ai. Nga shumëkush mund të jetë marrë si një gjest i shkëputur militant brenda maxhorancës, por në të vërtetë kemi të bëjmë, me sa duket, me një frazë që ilustron një fanatizëm të shtrirë që shpesh merr përthyerje anti-institucionale.

Në shumë institucione e zyra nuk ekziston e varur në mur fotoja e Presidentit të Republikës, ndonëse një gjë e tillë është detyrim ligjor. Ndërsa ka zyrtarë, që nuk janë ndalur me heqjen e fotos së Presidentit, por edhe e kanë zëvendësuar atë me foton e kryeministrit. Një nga këta është dhe Bardh Spahia, zv.ministri i shëndetësisë, në zyrën e të clit kishin hyrë kamerat e programit Fiks Fare dhe kishin filmuar egzaltimin e këtij zyrtari për kryetarin e partisë së vet, që këtë herë shpalosej nëpërmjet një fotoje të këtij të fundit në muret e zyrave të Republikës. Kush është Bardh Spahia? Është ai që dje nxorri lajmin, sipas të cilit, me ardhjen në krye të bashkisë së Lulzim Bashës, është ulur ndjeshëm ndotja e ajrit.

E.G.