Lajmi i ditës vjen nga Thumana: 17 vjeçari Ahmet Gjuci i ngujuar nga frika e gjaksit

Në Gazetën Shqiptare, në faqen 6, gazetarja Gilmana Bushati ka bërë një intervistë prekëse me një 17 vjeçar. Quhet Ahmet, banon në Thumanë, ka një vëlla e një motër, don të bëhet mekanik si i ati kur të rritet, ka një llogari në facebook, merr leksione në shtëpi, por nuk ka një shoqe, a shok, nuk shkon në shkollë si gjithë të tjerët, dhe jeton në çdo çast fqinj me rrezikun. Është ulok? Ka ndonjë sëmundje, që e mundon? Jo, përkundrazi, është për fat të mirë top shëndoshë si molla, por ... jeton i ngujuar prej gjakmarrjes. I ati, Qemal Gjuci, ka kryer një vrasje dhe ka humbur pa nam e nishan. Ka shtatë vjet që i fshihet policisë, dhe ndoshta kjo intervistë mund ta bëjë të dalë në shesh e të dorëzohet me idenë se prangat në duart e tij mund t’i bëjnë gjakësit të jenë më të çtendosur, më empathikë e më humanë!!!!

Lajm absurd, apo jo? Bën vaki që 12 kërkesat e BE-së për Shqipërinë mund të plotësohen, dhe vendi ynë mund ta marrë në fund të vitit statusin e kandidatit për në këtë klub, e bën vaki që shumë shpejt mund të bëhet dhe anëtar i BE-së, por e gjitha kjo të ngjan me një farsë sa herë dëgjon lajme të tilla, ku përmenden pa të keq termat ngujim, gjaks, kanun, e ku raportohet në mënyrë korrekte e neutrale se “ka pasur përpjekje të vazhdueshme për pajtim, të paktën për hir të fëmijëve, por pala tjetër nuk ka pranuar”!!!!  Në çfarë bote jetojmë?

M.N.